सहकारी ठगी प्रकरणको कार्यविधि मस्यौदा बनाउने जिम्मा समितिको सचिवालयलाई दिइयो

२३ जेठ, काठमाडौं । संसदीय छानबिन समितिले सहकारीको रकम ठगी सम्बन्धको छानबिन कार्यविधि बनाउन कामको जिम्मा समितिको सचिवालयलाई दिएको छ ।  सहकारीको बचत दुरूपयोग सम्बन्धमा बनेको संसदीय छानविन समितिको पहिलो बैठकले कार्यविधि बनाउने जिम्मा सचिवालयलाई दिएको हो । 

सभामुख देवराज घिमिरेसहित बसेको समितिले अर्को बैठक शुक्रबार बस्ने निर्णय गरेको छ । समिति सदस्य लेखनाथ दाहालले अर्को बैठक शुक्रबार बस्ने र कार्यविधिको मस्यौदा बनाउने जिम्मा सचिवालयलाई दिइएको जानकारी दिए । आजको बैठकमा कार्य विभाजनबारे पनि छलफल भएको थियो ।  

गएको जेठ १५ गते सहकारीको बचतमा देखिएको अपचलनको छानबिन गर्न भन्दै प्रतिनिधिसभा बैठकले सात सदस्यीय छानबिन समिति बनाएको हो । समितिले तीन महिनाभित्र प्रतिवेदन बुझाउनुपर्ने समय तोकिएको छ ।