बचतकर्ताको ७ करोड बढी रकम ठगेको आरोपमा स्क्वायर सहकारीका ३ जना सञ्चालक पक्राउ

२७ जेठ, काठमाडौं । स्क्वायर बचत तथा ऋण सहकारी संस्थाको ७ करोड रूपैयाँभन्दा बढी अपचलन गरेको आरोपमा तीन जना सञ्चालक पक्राउ परेका छन् । काठमाडौं कुलेश्वरका ६६ वर्षीय बासुदेवमान जोशी, केल टोलका ६७ वर्षीय सुवर्ण सेलालिक र नरदेवीका ५८ वर्षीय धर्मरत्न पाछैं पक्राउ परेका हुन् ।

उनीहरूलाई केन्द्रीय अनुसन्धान ब्यूरो (सीआईबी)को टोलीले पक्राउ गरेको हो । जोशी सञ्चालक समितिका अध्यक्ष, सेलालिक सचिव र पाछैं सदस्य हुन् । आकर्षक ब्याज दिने भन्दै रकम जम्मा गर्न लगाएर बचतकर्ताको ७ करोड ४० लाख ८७ हजार ८६० रुपैयाँ उनीहरूले हिनामिना गरेको सीआईबीले जनाएको छ ।  

सहकारीको सात करोड ४० लाख ८७ हजार रुपैयाँ अपचलन भएको उजुरीपछि उनीहरूलाई पक्राउ गरिएको सीआईबीका एसपी होविन्द्र बोगटीले जानकारी दिए । सहकारीको कार्यालय काठमाडौं नगरपालिका–२३ स्थित मखनमा छ ।