सागमा बजेट अभाव, ७ खेलको मात्रै प्रशिक्षण सुरु

काठमाडौं । १३ औं दक्षिण एसियाली खेलकुद सागको तयारी स्वरुप राष्ट्रिय टिमको प्रशिक्षण बुधबारबाट सुरु भएको छ ।राष्ट्रिय खेलकुद परिषद् राखेपले प्रारम्भिक चरणमा ७ खेलका खेलाडीलाई सहभागी गराएर प्रशिक्षण सुरु गरेको हो ।

आगामी मंसिरमा नेपालमै आयोजना हुने सागमा २७ खेल समावेश गरिए पनि बजेट अभावको कारण देखाउँदै राखेपले हाललाई ७ खेलको मात्रै प्रशिक्षण थालेको हो ।

बुधबार बिहान ललितपुरको सातदोबाटोस्थित अन्तर्राष्ट्रिय खेलकुद परिसरको कराँते हलमा सागको लागि खेलाडीको विशेष प्रशिक्षण कार्यक्रमको औपचारीक सुरुवात गरियो ।

पाराग्लाईडिङ, सुटिङ, जुडो, भारत्तोलन, आर्चरी, टेबल टेनिस र स्क्वास खेलको तयारी थालिएको हो । पहिलो चरणको प्रशिक्षण असार मसान्तसम्म चल्नेछ ।

हालै मध्यपश्चिममा सम्पन्न आठौं राष्ट्रिय खेलकुदमा स्वर्ण र रजत पदक जितेका खेलाडीलाई विशेष प्रशिक्षणमा समावेश गरिएको राखेपले जनाएको छ ।