इरान नेपालमा चिकित्सा शिक्षा, कृषि र खानी क्षेत्रमा काम गर्न इच्छुक

काठमाडौं । नेपाल कम्युनिष्ट पार्टी ‘नेकपा’ का अध्यक्ष पुष्पकमल दाहाल ‘प्रचण्ड’ र नेपालका लागि इरानका राजदूत डा. अलि चेगेनीलेबीच बुधबार भएको भेटवार्तामा नेपालको आर्थिक समृद्धिमा कृषि क्षेत्रको व्यावसायीकरण र कृषिमा आधारित उद्योगको विकासका बारेमा छलफल भएको नेता दाहालको सचिवालयले जनाएको छ ।

अध्यक्ष निवास खुमलटारमा आज अपराह्न भएको भेटमा पूर्वप्रधानमन्त्री दाहालले अहिले सरकारले नेपालमा वैदेशिक लगानीका लागि अनुकूल वातावरण बनाउन चाहेको बताए ।

अध्यक्ष दाहालले इरान र नेपाल पुराना मित्र राष्ट्र भएको उल्लेख गर्दै नेपाल प्राकृतिक रुपमा सुन्दर देश भएको र यहाँ पर्यटन, कृषि, जलविद्युतलगायत क्षेत्रमा लगानीको सम्भावना रहेको बताए ।

सो अवसरमा इरानी राजदूत डा अलीले नेपालमा काम गर्न आफूहरुसँग राम्रो क्षमता भएको बताउँदै चिकित्सा शिक्षा, कृषि, खानीलगायत क्षेत्रमा इरान काम गर्न इच्छुक रहेको बताए ।