मलेसियाको रोजगारी खुल्यो,शुन्य लागतमा मलेसिया जान पाउने

२६ भदौ,काठमाडौं । विगत डेढ वर्षदेखि अवरुद्ध मलेसियाको रोजगारी खुल्ने भएको छ । यस सम्बन्धमा नेपाल र मलेसियाका अधिकारीबीच आज क्वालालम्पुरमा सहमतिपत्रमा हस्ताक्षर भएको छ ।

दुबै मुलुकका श्रम मन्त्रालयका सहसचिव स्तरमा भएको सहमति अनुसार नेपाली कामदार शून्य लागतमा मलेसिया जाने पाउनेछन् । नेपाली कामदारका लागि आवश्यक सबै खर्च मलेसियाली रोजगारदाता कम्पनीले व्यहोर्ने छ । रोजगारीका लागि मलेसिया उड्नु अघि आवश्यक मेडिकल खर्चसमेत कामदारले पहिलो महिनाको तलबमै जोडेर पाउने व्यवस्था गरिएको छ । यसबाट नेपाली युवालाई ठूलो राहत हुने श्रम मन्त्रालयले विज्ञप्ति जारी गरी उल्लेख गरेको छ ।

लामो समय मलेसियाको रोजगारी अवरुद्ध हुँदा दुबै मुलुकलाई समस्या परेको थियो । यसका लागि दुबै पक्षबीच पटक पटक छलफल भएको थियो । यसपाला भने दुबै मुलुकका सहसचिवस्तरीय छलफलले समस्याको हल निकालेको पनि विज्ञप्तिमा उल्लेख छ ।

नेपाली प्रतिनिधिमण्डलको नेतृत्व सहसचिव रामप्रसाद घिमिरेले गरेका थिए । मलेसिया नेपाली कामदारको सबैभन्दा ठूलो रोजगारदाता हो । नेपाली कामदारलाई मलेसियाली रोजगारदाता कम्पनीले विभिन्न वहानामा आर्थिक शोषण गरेको भन्दै नेपाल सरकारले ०७५ जेठ १२ देखि श्रम स्वीकृतिमा रोक लगाएको थियो ।