प्रहरी बुलेटिन : कहाँ- के भयो ? [ थाहा पाउनुस ]

४ कार्तिक, काठमाडौं । सक्कली जस्तो देखिने १ किलो नक्कली सुन देखाई ठगी गरेको अभियोगमा ६ जनालाई आइतबार दिउँसो प्रहरीले पक्राउ गरेको छ ।

पक्राउ पर्नेहरुमा काठमाडौं कपन बस्ने सिन्धुपाल्चोक वाह्रविसे नगरपालिका-२ घर भएकाहरू ४१ वर्षीय मंगले तामाङ, २६ वर्षीय सुजन रसौली, ३३ वर्षीय विष्णु बहादुर राउत तथा ३१ वर्षीय नवराज राउत, रामेछाप दोरम्वा गाउँपालिका-२ घर भएका ३१ वर्षीय रोशन वुढा मगर र ललितपुर सानागाउँ बस्ने सिन्धुपाल्चोक वाह्रविसे नगरपालिका-२ घर भएका २३ वर्षीय किरण लामा रहेका छन् ।

काठमाडौं कपन निलोपुल नजिकै उक्त परिमाणको नक्कली सुन देखाई ५० लाखरुपैयाँमा विक्री गर्न ग्राहक खोजिरहेको भन्ने सूचना प्राप्त हुनासाथ महानगरीय प्रहरी परिसर काठमाडौंबाट खटिएको प्रहरीले खरिदकर्ताले सुन खरिद गर्न लागेको ५ लाख रुपैयाँ सहित मोलतोल गर्दै गरेको अवस्थामा फेला पारी उनीहरुलाई पक्राउ गरेको हो । प्रहरीले उनीहरुको साथबाट नक्कली सुन १ केजी र मोबाइल ६ थान समेत बरामद गरेको छ ।

मोरङको हरैचा नगरपालिका-७ स्थितबाट अवैध लागूऔषध ब्राउनसुगर करिब २ ग्राम सहित सोही नगरपालिका-४ बस्ने २८ वर्षीय सरोज गिरीलाई आइतबार राति प्रहरीले पक्राउ गरेको छ । प्रहरी चौकी गछियाबाट खटिएको प्रहरीले उनलाई उक्त परिमाणको लागूऔषध सहित फेला पारी पक्राउ गरेको हो ।

जुवा खेल्ने ५१ जना पक्राउ 

कैलाली, गोदावरी नगरपालिका-७ लालपुर बस्ने बीरबहादुर वलीको होटलमा जुवातास खेलिरहेको अवस्थामा सोही ठाउँ बस्ने ३५ वर्षीय टेक बहादुर ओली लगायत २८ जनालाई १ लाख ५२ हजार ७ सय ५० नेपाली रुपैयाँ, २ हजार २ सय ७० भारतीय रुपैयाँ र तास सहित आइतबार राति प्रहरीले पक्राउ गरेको छ ।

नवलपरासी ‘पूर्व’, देवचुली नगरपालिका-६ मुण्डेस्थित आधार रिसोर्टमा जुवातास खेलिरहेको अवस्थामा देवचुली नगरपालिका-९ बस्ने ४२ वर्षीय कोचिन बहादुर गुरूङ लगायत १८ जनालाई नगद १ लाख ४२ हजार ९ सय ४० रुपैयाँ सहित सोमबार बिहान प्रहरीले पक्राउ गरेको छ ।

दाङ, घोराही उपमहानगरपालिका-१५ मिलनचोक डेरा गरी बस्ने रोल्पा माडी गाउँपालिका-४ घर भएका २९ वर्षीय निम बहादुर भण्डारीको कोठामा तास खेलिरहेको अवस्थामा भण्डारी सहित ५ जनालाई नगद ७४ हजार ५ सय ६० रुपैयाँ र २ बुक तास सहित आइतबार साँझ प्रहरीले पक्राउ गरेको छ ।

मोरङमा हुण्डी कारोबारमा संलग्न रहेको अभियोगमा बिराटनगर महानगरपालिका-१५ बस्ने ४९ वर्षीय बिनोद प्रसाद साहलाई आइतबार साँझ प्रहरीले पक्राउ गरेको छ ।

बिराटनगर महानगरपालिका-७ स्थितमा अबैध हुण्डी कारोबार भइरहेको भन्ने सुचनाको आधारमा जिल्ला प्रहरी कार्यालय मोरङबाट खटिएको प्रहरीले साहलाई कारोबारमा प्रयोग गरेको नगद ७ लाख १८ हजार ८ सय ६० रुपैयाँ सहित फेला पारी पक्राउ गरेको हो ।

मकवानपुरमा लुकाई छिपाई राखेको करिब ५ लाख १७ हजार ६ सय ५० रुपैयाँ मूल्य बराबरका अन्दाजी ७ केजी चाँदीका विभिन्न सामान सहित पुष्पा डाईस कटिङ पसलका संचालक हेटौंडा उपमहानगरपालिका-२ संगमचोक बस्ने भारत मोतिहारी हरपुर गाँउ पंचायत-५ आधापुर घर भएका १९ वर्षीय राकेश कुमार सुनारलाई आइतबार साँझ प्रहरीले पक्राउ गरेको छ ।

वडा प्रहरी कार्यालय सानोपोखराबाट खटिएको प्रहरीले सुनारको ना.१४ प २८३६ नम्बरको मोटरसाइकल जाँच गर्दा मोटरसाइइकलको भित्रि भागमा लुकाई छिपाई राखेको उक्त मूल्य बराबरको चाँदीका बिभिन्न मूर्ति, सिक्का, पाउजु, सिन्दुर बट्टा, थाली र गिलास लगायत सामान फेला पारेको थियो ।

सुनारलाई आवश्यक कारबाहीको लागि उक्त सामानसहित भन्सार कार्यालय पठाइने जिल्ला प्रहरी कार्यालय मकवानपुरले जनाएको छ ।

सुनसरीको धरान उपमहानगरपालिका-१७ मंगलबारे टेम्के मार्ग बस्ने २२ वर्षीय लोकेन्द्र राई र २२ वर्षीय सईन्द्र राईलाई धारिलो हतियार छुरा प्रहार गरेको अभियोगमा ३ जनालाई आइतबार दिउँसो प्रहरीले पक्राउ गरेको छ ।

पक्राउ पर्नेहरुमा धरान उपमहानगरपालिका-१० बस्ने २४ वर्षीय समी राई, धरान उपमहानगरपालिका-१८ बस्ने २७ वर्षीय तुल बहादुर राई र धरान उपमहानगरपालिका-११ बस्ने १८ वर्षीय अबिराज राई रहेका छन् ।

टेम्पोको भाडाको बिषयलाई लिएर उनीहरुले छुरा प्रहार गरेको भन्ने खबर प्राप्त हुनासाथ ईलाका प्रहरी कार्यालय धरानबाट खटिएको प्रहरीले छुरा प्रहार गर्ने तीनै जनालाई पक्राउ गरेको हो । छुरा प्रहारबाट घाइते भएका दुवै जनाको घोपा अस्पताल धरानमा उपचार भइरहेको छ ।

मोरङ, धनपालथान गाउँपालिका-२ ठनठनियाबाट नागिन २५ प्याकेट, झिरझिरे १० प्याकेट, रकेट बम २ प्याकेट, आलु बम २ प्याकेट र चक्लेट बम १ प्याकेट पटाका आइतबार दिउँसो प्रहरीले बरामद गरेको छ । प्रहरी चौकी अमाहीबाट खटिएको प्रहरीलाई देख्नासाथ अपरिचित व्यक्तिले उक्त पटाका छाडी फरार भएपश्चात प्रहरीले बरामद गरेको हो ।

यसैगरी मोरङ, बिराटनगर महानगरपालिका वडा नम्बर १५ र १६ का बिभिन्न स्थानबाट करिब २० हजार रुपैयाँ मूल्य बराबरको नागिन, कोब्रा, चकलेट बम र फुलझरी पटाका आइतबार प्रहरीले बरामद गरेको छ । ईलाका प्रहरी कार्यलय रानीबाट खटिएको प्रहरीले उक्त पटाका फेला पारी बरामद गरेको हो ।

सप्तरी, राजबिराज नगरपालिका-४ स्थित नेता चोकमा बेवारिशे अवस्थामा रहेको करिब १ लाख ५० हजार रुपैयाँ मूल्य बराबरका बिभिन्न किसिमका पटाका आइतबार साँझ प्रहरीले बरामद गरेको छ । जिल्ला प्रहरी कार्यालय सप्तरीबाट खटिएको प्रहरीले उक्त पटाका बरामद गरेको हो ।

काठमाडौंको गोकर्णेश्‍वर नगरपालिका-५ गोकर्ण भैरव चोक बस्ने कृष्ण हरि कार्कीको घरबाट करिब १ लाख ७५ हजार रुपैयाँ मूल्य बराबरको सुनका गरगहना आइतबार दिउँसो चोरी भएको छ ।

यसैगरी काठमाडौं महानगरपालिका-१६ बालाजु डेरा गरी बस्ने पर्वत जलजला गाउँपालिका-८ घर भएका २८ वर्षीय दिपक गौतमको कोठाबाट करिब ४ लाख २० हजार रुपैयाँ मूल्य बराबरको सुनका बिभिन्न किसिमका गरगहना आइतबार दिउँसो चोरी भएको छ ।

यसैगरी काठमाडौं, कागेश्वरी मनोहरा नगरपालिका-८ शिव चोक डेरा गरी बस्ने सिन्धुपाल्चोक मेलम्ची घर भएका कुमार नेपालीको कोठाबाट नगद तथा सुनका गरगहना समेत गरी करिब १ लाख ८५ हजार रुपैयाँ बराबरको धनमाल आइतबार राति चोरी भएको छ । चोरीमा संलग्न फरार व्यक्तिहरुको खोजी गर्नुका साथै यस सम्बन्धमा स्थानीय प्रहरीले आवश्यक अनुसन्धान गरिरहेको छ ।

आगलागी

रुपन्देही, सोलुखुम्बु, सप्तरी, ताप्लेजुङ र मोरङका विभिन्न स्थानमा भएका छुट्टाछुट्टै आगलागीबाट करिब ३ करोड ११ लाख ५० हजार रुपैयाँ बराबरको धनमाल जलेर नष्ट भएको छ ।

रुपन्देही, बुटवल उपमहानगरपालिका-६ स्थित स्याङजा बिर्घा गाउँपालिका-३ घर भएका गोविन्द पाण्डेको शिखा सर्जिकल एण्ड साईन्स हाउसमा बिद्युत सर्ट भई सोमबार बिहान आगलागी हुँदा करिब २ करोड रुपैयाँ बराबरको धनमाल जलेर नष्ट भएको छ ।

सोलुखुम्बु, नेचासल्यान गाउँपालिका-१ ख्याम्पु बस्ने चन्द्र प्रकाश कोईरालाको ढुङ्गाको घरमा करेन्ट सर्ट भई सोमबार बिहान आगलागी हुँदा घर र सोही घरमा डेरा गरी बस्ने रमेश कुमार राईको बैंक स्टोर सप्लायर्स साझेदारी स्टोरमा रहेको जुत्ता, चप्पल, रेडिमेट कपडा लगायतका सामान जलेर करिब ९८ लाख रुपैयाँ बराबरको धनमाल नष्ट भएको छ ।

सप्तरी, तिलाठी कोईलाडी गाउँपालिका-१ बेल्ही बस्ने मोहमद ईसलामको गोठमा बिद्युत सर्ट भई सोमबार बिहान आगलागी हुँदा गोठ पूर्णरुपमा जलेर करिब २ लाख ५० हजार रुपैयाँ बराबरको धनमाल नष्ट भएको छ ।

ताप्लेजुङ, फक्तालुङ गाउँपालिका-२ खेजेनिम बस्ने निर कुमार लिम्बुको घरमा आइतबार दिउँसो आगलागी हुँदा करिब ९ लाख रुपैयाँ बराबरको धनमाल जलेर नष्ट भएको छ । मोरङ, सुन्दरहरैचा नगरपालिका-९ बस्ने पेशल कुमार श्रेष्ठको गोठमा आइतबार राति आगलागी हुँदा गोठ पूर्णरुपमा जलेर करिब २ लाख रुपैयाँ बराबरको धनमाल नष्ट भएको छ ।

स्थानीय बासिन्दा तथा दमकलको सहयोगमा प्रहरीले आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।