५० केजी गाँजासहित एक जना भारतीय नागरिक पक्राउ

२४ वैशाख, महोत्तरी । ५० केजी गाँजा सहित महोत्तरी प्रहरीले एक जना भारतीय नागरिकलाई पक्राउ गरेको छ।

भारतीय नम्बर प्लेट ४३ एवी ५६६  नम्बरको सेतो रङ्गको कारको पछाडि डिकीमा लुकाएर जलेश्वरतर्फ जाँदै गरेका सीतामढी ग्राम पुनौरा टोल वडा नम्बर ३ का सैयद अन्सारीलाई आज पक्राउ गरिएको प्रहरीले जनाएको छ।

चालक तीव्र गतिमा जलेश्वरतर्फ भाग्न खोजेपछि प्रहरीले उनलाई झन्डै २० किलोमिटरसम्म पछ्याएको थियो। इलाका प्रहरी कार्यालय बर्दिवासबाट खटिएका प्रहरी टोलीले चेकजाँच गर्दा उक्त कारको पछाडिको डिक्कीमा २ पोका र चालक बस्ने सिटको पछाडि फ्लस बटन बनाई ८ पोको गरी जम्मा १० पोको गाँजा फेला परेको जिल्ला प्रहरी कार्यालयका सूचना अधिकारी संतुलाल प्रसाद जैसवालले जानकारी दिए।

पोकोहरू तौल गर्दा प्रत्येक पोकोमा ५ किलोको दरले जम्मा ५० किलोग्राम गाँजा भेटिएको जैसवालको भनाइ छ। प्रहरीले उक्त कार बरामद गरेको छ भने अन्सारीलाई नियन्त्रणमा लिएर थप अनुसन्धान भइरहेको प्रहरीले जनाएको छ।

केही दिन अगाडि पनि मटिहानीबाट जनकपुरतर्फ जाने  क्रममा लागूऔषधसहित एक जना भारतीय नागरिक नै पक्राउ परेका थिए।