सीमा विवाद अन्तर्राष्ट्रियकरण नगर्ने पक्षमा प्रचण्ड

२५ कार्तिक,काठमाडौं । सत्तारुढ नेपाल कम्युनिष्ट पार्टीका अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ले वहुचर्चित नेपाल भारत सीमा विवादलाई अहिल्यै अन्तर्राष्ट्रियकरण नगर्दा उचित हुने राय दिएका छन् ।

प्रतिनिधिसभा अन्तर्गतको राज्य व्यवस्था समितिको आजको वैठकमा सहभागी प्रचण्डले नेपाल भारत सीमा विवादलाई अन्तर्राष्ट्रिय मञ्चमा उठाउने बेला भैनसकेको बताएका हुन् । भारतसँग कूटनीतिक रुपमै सहमतिमा विवाद सल्टाउन सकिने विश्वास व्यक्त गर्दै प्रचण्डले भने – भारतसँगको सीमा विवादलाई हामीले हचुवाका भरमा अन्तर्राष्ट्रियकरण ग¥यौं भने अझै तनाव थपिन सक्छ ।

उत्तेजना र भावनाबाट मात्रै हामीले काम ग¥यौं भने समस्या अझै उल्झन सक्ने उनको भनाई थियो । यद्यपि उनले नेपालले आफ्नो एक इञ्च पनि भूमि नछाड्ने चाहिं बताए । भारतीय प्रधानमन्त्री नरेन्द्र मोदीको स्थिर सरकार शक्तिशाली भएकाले कूटनीतिक बलमै समस्याको हल खोज्दा नेपाललाई फाइदा पुग्ने उनको तर्क थियो ।

भारतसँगको सीमा विवादका सन्दर्भमा अहिले देशभित्र अभूतपूर्व एकता भएकाले अहिले नै नेपालले आफ्नो हक स्थापित गर्नुपर्नेमा प्रचण्डले जोड दिए ।

यो विवादबारे छलफल गर्न आज समितिले प्रधानमन्त्री केपी ओलीलाई समेत उपस्थित हुन आग्रह गरेको भएपनि उनी आएनन् । प्रधानमन्त्रीको तर्फबाट बैठकमा भूमि व्यवस्थापन तथा सहकारी मन्त्री पद्मा अर्यालले धारणा राखेकी थिइन् ।