दश दिन सम्झाउँछु, एघारौं दिनदेखि कडा जरिवाना गर्छु : पाण्डे

प्रकाश परिष्कार, रामेछाप ।

१२ माघ, काठमाडाैं । रामेछाप जिल्ला प्रहरी ट्राफिक प्रमुख रामेश्वर पाण्डेले मन्थलीको सडक सवारी नियमलाई कडाइका साथ लागु गराइरहेका छन् । विगतमा दिनमा जिल्लामा रहेका ट्राफिक प्रहरी प्रमुखहरूलाई सडकमा विरलै देख्ने गरिएको भएता पनि पाण्डेको प्रवेशपछि भने मन्थलीको सडक सवारी व्यवस्थापन मजबुद् बन्दै गएको हो । सडकमा गुड्ने सावरीको गति, लेनको सही प्रयोग, मादक पदार्थ सेवन गरी सवारी चलाए-नचलाएको लगायतका विषयहरू उनी कडाईका साथ सडकमा जाँच गरिरहेका देखिन्छन् ।

गत शनिवार पाण्डे सदाजस्तै ट्राफिक चोकको धुलोमा माक्स् लगाएर सवारी आवागमनलाई नियाली रहेका थिए । करिब बिहान ९ बजेदेखि नै लामो दूरीबाट राजधानीका लागि गाडीहरू यहाँ आइपुग्छन् । अहिले उनी आउने सबै गाडीहरूमा फोहोर फाल्नको लागि डस्टविनको खोजी गरिरहेका छन् । विगत १ हप्तादेखि नै प्रत्येक गाडीमा फोहोर फाल्ने डस्टविनको जोहो गर्न सचेत गराइरहेका पाण्डेलाई हामीले सोध्यौं, ‘तपाईं आएपछि मात्रै हरेक १५ सिट क्षमता भन्दा माथिका गाडीमा किन डस्टविन खोज्न थाल्नुभयो ?’

यसको जवाफमा उनी भन्छन्, ‘यो मैले खोजेको होइन आवश्यकताले खोजेको हो । आफ्नो वरपरको वातावरण अझ भन्दा आफूले प्रयोग गर्ने सडकमा बान्ता गरेर फालिएका प्लास्टिकका पोका, चाउचाउ, कुरमुरे, लेजका खोल, मिनरल वाटरका बोतल छरिएको कोही पनि हेर्न चाहँदैन । मैले त गाडीमा यात्रा गर्ने यात्रुहरूले आफूले उत्पादन गरेका फोहोरहरू डस्टविनमा जम्मा गर्नुस् । जहाँतहीँ नफाल्नुस् । यात्रुहरूलाई फोहोर फाल्ने डस्टवीनको प्रयोग गर्न लगाउनुस् भनेर यात्रु तथा सवारी स्टाफहरूलाई भनिरहेको छु ।’

आफू आएर मात्र यस्तो गर्न लागिएको भन्ने कुरा उनी स्वीकार्दैनन् । आफूले मात्र होइन फोहोरको व्यवस्थापन सबै सचेत नागरिकहरूको कर्तव्य भएको पाण्डे ठान्छन् । ‘म भन्दा अघिल्लो कार्यकालका प्रहरी प्रमुखज्यूले पनि यो बारेमा सोच्नु भएको हुँदो हो भलै म आएर थालनी गरेको हूँ । यो काम मेरो होइन, समग्र डिपार्टपेन्टको काम हो, जो म गरिरहेछु ।

फेरि मैले मात्र यो काम गरेको होइन नि ? म सँग मेरा अन्य सहकर्मी मित्रहरू पनि त यो कामको लागि खटिनु भएको छ ।’ पाण्डे भन्छन् । पाण्डेको मन्थली आगमन पछि साना सावरी साधन अटोको गति नियन्त्रणमा आएको छ । कुनै समयमा त अटोहरू गुड्ने हैन उडौंला जस्तो गरी हुँइकिन्थे । यसले सडक सवारीलाई जुनसुकै बेला पनि जोखिमको मुखमा लगिरहेको हुन्थ्यो ।

शनिवार मात्रै पनि लामो दूरीबाट आउने केही यात्रुबाहक बसमा डस्टवीनको व्यवस्था गरिएको थिएन । सो दिन भन्दा १ हप्ता अघिदेखि नै सडकमा बसेर आफ्नो सवारीमा डस्टवीन राख्न निर्देशन दिइसकेका पाण्डेले यस पटक भने निकै कडाइका साथ चेतावनी दिँदै भने, ‘हेर्नुस्, मैले पहिलेदेखि नै भन्दै आएको छु । दशौं दिनसम्म तपाईंहरूलाई म सम्झाउँछु, एघारौं दिनमा पनि यस्तै डस्टवीन नभएको र आरक्षित महिला सीटमा पुरूष बसाएको देखें भने कडा जरिवाना गर्छु ।’

पाण्डेले केही पुरूष यात्रुलाई महिला सीटमा बसेको अवस्थामा उनीहरूलाई अनुरोध गरी सो सीटबाट हटाएर महिलालाई सो सीटमा बसाइरहेका थिए । केही बसहरूमा डस्टवीनको रूपमा गाडी धुने सानासाना बाल्टी देखाइरहेका सह चालकहरूलाई डस्टवीनको फोटो समेत मोबाइलमा देखाएर यस्तै डस्टवीन प्रयोग गर्न सल्लाह दिइरहेका थिए । पाण्डेको यस्तो कार्यको सर्वत्र प्रशंसा भइरहेको छ ।

लेखक मन्थलीबाट प्रकाशन हुने मालश्री साप्ताहिकका सम्पादक हुन् ।