इटलीमा कोरोनाबाट ११ को मृत्यु, तीन सय जना सङ्क्रमित

१४ फागुन एजेन्सी । थुप्रै युरोपेली देशले आफूकहाँ पहिलोपल्ट नयाँ कोरोनाभाइरसको सङ्क्रमण देखापरेको अन्तराष्ट्रिय समाचार एजेन्सीहरुले जनाएका छन् । कोरोनाभाइरसको प्रकोप देखिएको इटलीसँग ती सबै घटना जोडिएको बीबीसीमा उल्लेख गरिएको छ ।

अस्ट्रिया, क्रोएशिया र स्विट्जरल्यान्डका अनुसार इटली पुगेर आएका व्यक्तिहरूमा कोरोनाभाइरस सङ्क्रमण देखिएको हो । कोरोनाभाइरसको सङ्क्रमण देखिने पहिलो ल्याटिन अमेरिकी देश ब्राजिल बनेको छ । सङ्क्रमित व्यक्ति इटलीबाट फर्किएका ब्राजिलका नागरिक भएको बताइएको छ । युरोपमा हालसम्म सबैभन्दा नराम्ररी प्रभावित देश इटली बनेको छ ।

त्यहाँ तीन सय जनाभन्दा बढी व्यक्ति सङ्क्रमित भएका छन् भने ११ जनाको मृत्यु भइसकेको छ । तर उसका छिमेकी देशहरूले इटलीसँगको नाका बन्द गर्ने कदम “असमानुपातिक“ हुने बताएका छन् । युरोपभरि र मध्य एवम दक्षिणी इटलीमा सङ्क्रमणका नयाँ बिरामी देखिइरहँदा मङ्गलवार सम्पन्न एउटा बैठकमा फ्रान्स, जर्मनी र इटलीका स्वास्थ्यमन्त्री तथा युरोपेली आयोगले नाकाहरू खुला राख्ने प्रतिबद्धता जनाएका हुन् ।

कोभिड-१९ अर्थात नयाँ कोरोनाभाइरसको प्रकोप अझै फैलन सक्ने भन्दै विश्व स्वास्थ्य सङ्गठनका एक वरिष्ठ अधिकारीले तत्काल तयारी गर्न देशहरूलाई सुझाव दिएका छन् । ब्रुस एलवार्डले थुप्रै राष्ट्रहरू नयाँ कोरोनाभाइरसको प्रकोपसँग जुझ्न तयार नरहेको बताए । उनले भने, “पहिलो कुरा मानसिकतामा परिवर्तन हुनुपर्छ । यो भाइरस विश्वभरि चाँडै फैलन सक्छ ।“

नयाँ कोरोनाभाइरसका ८० हजार सङ्क्रमणका घटनाका बीच खासगरि इरानमा देखिएको प्रकोपको स्तर चिन्ताजनक रहेको बताइन्छ । इरानी अधिकारीहरुका अनुसार कोरोनाभाइरसका कारण त्यहाँ अहिलेसम्म १५ जनाले ज्यान गुमाइसकेका छन ्। इरानका स्वास्थ्य उपमन्त्रीमा समेत कोरोनाभाइरसको सङ्क्रमण देखिएको छ ।

यसैबीच, नयाँ कोरोनाभाइरसको प्रकोपका कारण संयुक्त राज्य अमेरिका र युरोपका शेअर बजारमा लगातार दोस्रो दिन नकारात्मक प्रभाव परेको छ । अमेरिकी शेअर बजारको एक सूचक मानिने डाउ जोन्समा सोमवारयता छ प्रतिशतभन्दा बढीले गिरावट आएको छ । तर ट्रम्प प्रशासनका आर्थिक सल्लाहकार ल्यारी कडलोले कोरोनाभाइरसले आर्थिक त्रासदी फैलाउने कुरामा आफ्नो विश्वास नरहेको र मूल्य घटेकाले शेअर खरिद गर्ने यो ’राम्रो समय’ भएको बीबीसीमा उल्लेख छ ।