‘युवराजजी’लाई हटाउन कुनै व्यापारीसँग छलफल गरेको छैन : प्रचण्ड

१६ फागुन, भरतपुर । प्रधानमन्त्री केपी शर्मा ओलीलाई गत बुधबारको सचिवालय बैठकले गरेको निर्णय बमोजिम उपाध्यक्ष बामदेव गौतमलाई राष्ट्रियसभामा मनोनित गर्न थप दवाब दिने उद्येश्यले आफ्नो निवास खुमलटारमा गोप्य बैठक गरी चितवन पुगेका पुष्पकमल दाहालले पूर्वनिर्णय कार्यान्वयन हुनेमा जोड दिएका छन् ।

पार्टी कार्यक्रममा भाग लिन भरतपुर आइपुगेका प्रचण्डले बिमानस्थलमा भेला भएका सञ्चारकर्मीसँग भने- “सचिवालय बैठक कार्यान्वयन हुन्छ ।” प्रधानमन्त्री ओलीले एकदुई दिन भित्रै बामदेवजीलाई राष्ट्रियसभामा सिफारिश गर्नुहुनेमा मलाई पूर्ण विश्वास छ – उनले भने । सचिवालय बैठकले बामदेवलाई राष्ट्रियसभामा लैजाने निर्णय गरे लगत्तै ओलीले कार्यान्वयन नगर्ने भन्दै चुनौती दिएपछि विकसित घटनाक्रमलाई इंगित गर्दै प्रचण्डले भने – ओलीजीको समस्या पनि बुझ्नुपर्छ हामीले ।

“अर्थमन्त्री डा. युवराज खतिवडाले राम्रो काम गर्नु भएको छ, उहाँलाई पनि निरन्तरता दिनुपर्छ, यी दुबै काम प्रधानमन्त्रीले गर्नु हुनेछ” – उनले भने । अर्थमन्त्रीको निरन्तरतामा कुनै समस्या छैन भन्दै उनले प्रधानमन्त्रीले दुबै काम मिलाएर गर्नु हुनेमा विश्वश्त रहेकाे उनकाे भनाइ थियाे ।

अर्थमन्त्री डा.खतिवडालाई रोक्न तपाईं लगायत नेताहरु केही व्यापारीको पु्च्छर बन्नु भएको प्रधानमन्त्रीको आरोपबारे के भन्नु हुन्छ भनी पत्रकारहरुले सोधेको प्रश्नको उत्तर दिंदै उनले भने – प्रधानमन्त्रीलाई कसैले गलत सूचना दिएको होला, मैले युवराजजीलाई हटाउन कुनै व्यापारीसँग कुनै छलफल गरेको छैन ।