नेपाल रेडक्रसको महाधिवेशन चैत्र २३ देखि २५ गते काठमाडौंमा

१७ फाल्गुण, काठमाडौं । २०७६ फागुन २१–२३ गते काठमाडौंमा हुने भनिएको नेपाल रेडक्रस सोसाइटी (नेरेसो) को केन्द्रीय महाधिवेशन आगामी चैत्र २३ देखि २५ गतेसम्म काठमाडौंमा हुने गरी मिति हेरफेर भएको छ । २०७६ फागुन १४ गते काठमाडौंमा बसेको केन्द्रीय कार्यसमितिले विशेष कारणबस सो निर्णय गरेको बताइएको छ ।

“नेरेसोलाई कानुनी हिसाबले सुदृढ र व्यवस्थित गर्न नेपाल रेडक्रस र नेपाल सरकारका विभिन्न निकायहरुको बीचमा भईरहेको छलफल र पहललाई थप बल पुर्याउनुका साथै संस्थागत रुपमा सकारात्मक परिणाम हासिल गर्ने सन्दर्भमा रेडक्रसको अन्तर्राष्ट्रिय महासंघ (IFRC) को मुख्यालय जेनेभालाई बस्तुगत जानकारी गराई संस्थागत अनुरोध गरिए अनुसार केही समय आवश्यक हुने भएका कारण महाधिवेशनको मिति एकमहिना पर सारिएको कार्यसमितिको वैठक पश्चात रेडक्रस अध्यक्ष सञ्जीव थापाले नेपालबहस डटकमलाई जानकारी दिएका छन् ।

महासंघको टोली आगामी हप्ता नेपाल आई नेरेसोको संस्थागत सुदृढीकरणका विविध विषयमा नेपालका रेडक्रसकर्मी तथा बाह्य सान्दर्भिक पक्षसँग छलफल गर्ने कार्यक्रम रहेको अध्यक्ष थापाले बताए ।

संस्थागत यो पहलले नेपाल रेडक्रसलाई आधारभूत सात सिद्धान्तका आधारमा मानवीय सेवालाई निरन्तरता दिन सघाऊ पुर्याउने र सरकार लगायत विभिन्न निकायहरुको सुसम्बन्धलाई थप टेवा दिने अपेक्षा नेरेसोले गरेको छ ।