आज त्रिविद्वारा परीक्षा सुचारु, भोलिदेखि परीक्षा रोक्‍न बैठक बस्दै

६ चैत, काठमाडौं । त्रिविले सरकारको निर्णय विपरीत बिहीबारका सबै परीक्षा सञ्चालन गरेको छ । सरकारको निर्णय त्रिविले अटेर गर्दै आज परीक्षा संचालन गरे पनि भोलीदेखि हुने परीक्षालाई सुचारु गर्ने कि रोक्ने भन्ने बिषयमा आज बैठक बस्ने त्रिवीले जनाएको छ ।

संसारभर फैलिइरहेको महामारी कोरोना भाइरस ‘कोभिड-१९’ को सम्भावित संक्रमणलाई मध्यनजर गर्दै सरकारले आज ‘चैत ६ बिहीबार’ बाट हुने भनिएका माध्यमिक शिक्षा परीक्षा ‘एसईई’ लगायतका सबै परीक्षा रोक्ने निर्णय गरे पनि त्रिभुवन विश्वविद्यालले त्यो निर्णयलाई बेवास्ता गरेको बुझिन आएको छ ।

उपप्रधानमन्त्री तथा रक्षामन्त्री ईश्वर पोखरेल संयोजकत्वमा बनेको कोरोना रोग रोकथाम तथा नियन्त्रण उच्चस्तरीय समन्वय समितिले बुधबार नै बिहीबारदेखिका सबै परीक्षा तथा पठनपाठन रोक्ने निर्णय गरेको थियो। सत्तारुढ नेकपा सचिवालयको निर्देशनपछि सरकारले यस्तो निर्णय गरेको थियो। लगत्तै शिक्षा मन्त्रालयले पनि सबै परीक्षा रोक्न निर्देशन जारी गरेको थियो।

तर, त्रिविले बिहीबार बिहानका सबै परीक्षा सञ्चालन गर्‍यो भने मध्यान्हदेखि सुरु परीक्षा पनि जारी रहको परीक्षा नियन्त्रक पुष्पराज जोशीले बताए। तर चैत ७ गते शुक्रबारदेखिका परीक्षा स्थगित गर्नेबारे कार्यकारी परिषद्को आपत्‌कालीन बैठक आज बस्ने र सरकारको निर्णयअनुसार भाेलीदेखि हुने परीक्षालाई परिषद्ले स्थगित गर्न सक्ने जोशीले बताए ।