सवारी पासको गाईजात्रा, काठमाडौंका सीडिओ नै सम्पर्कविहीन !

१८ चैत्र, काठमाडौं । आजबाट लकडाउनको दोस्रो इनिङ शुरु भएको छ । सरकारले पहिलो चरणमा हिजोसम्मका लागि नेपाल लकडाउन गरेको थियो । कोरोना भाइरसको संभावित संक्रमणबाट जोगिन सरकारले दोस्रो चरणको लकडाउन आजबाट चैत २५ गतेसम्मका लागि निरन्तरता दिएको छ । अर्थात जनजीवन उस्तै ।

सर्वसाधारण अझै घरमै बस्नुपर्ने । अनावश्यक मानिसको चहलपहल बजारमा नहोस् भन्ने चाहना यथावत । सबै कुरा उस्तै तर सवारी पासमा भने नयाँपन । सरकारले गतहप्ता जारी गरेको सवारी पास आजबाट अमान्य भनेको छ । कतिपय अत्यावश्यकीय काममा हिंडेकाहरु ट्राफिक प्रहरीको फन्दामा परेका छन् । सञ्चारमाध्यमका लागि जारी गरिएको पाससमेत ट्राफिक प्रहरीले अस्वीकार गरेको छ । यसबाट अत्याबश्यकीय कामका लागि बाहिर निस्केकाहरु अलपत्र परेका छन् ।

अब के गर्नु प¥यो त ? ट्राफिक प्रहरी भन्छन्– नयाँ म्यादसहितको पास चाहियो, अनि मात्र हामी चलाउने अनुमति दिन सक्छौं । ट्राफिक प्रहरीलाई त्यही आदेश थियो, उसले त्यही ग¥यो । तर विचित्रको कुरा के भने सरकारले एक साताका लागि लगाएको लकडाउन एकसाता थपिएपछि सवारी पासको म्याद आफ्से आफ थपिएको बुझ्नु पर्ने होइन ? सामान्यतः बुझ्ने कुरा त्यही हो , तर सवारी पास जारी गर्न अनुमति प्राप्त जिल्ला प्रशासन कार्यालय भने फेरि नयाँ पास जारी गर्न उत्सुक देखिएको छ ।

सरकार भन्छ– धेरै भीडभाडमा नजाअाै, संक्रमणको खतरा हुन्छ । तर स्थानीय प्रशासन भने फेरि भीड बढाएर सवारी पास जारी गर्न चाहन्छ । पहिल्यै जारी भएको पासमा कुनै कैफियत भए जुनसुकै बेला निलम्बन गर्न सक्ने अधिकार छँदैछ । तर किन हो प्रशासक चाहिं अर्काे भीड बढाएर संक्रमणको जोखिम बढाउन चाहन्छन् । सरकारले गरेको लकडाउन भीड घटाउन की बढाउन ?

यस सम्बन्धमा थप बुझन् काठमाडौं जिल्ला प्रशासन कार्यालयका प्रमुख जिल्ला अधिकारी जनकराज दाहालसँग सम्पर्क गर्दा मोबाइलको स्वीच अफ गरिएको छ । काठमाडौंको सीडियो जस्तो संवेदनशील पदमा बसेका व्यक्तिको सम्पर्क नम्बर बन्द रहनु गैरजिम्मेवारीको नमूना नै हो । यस अगाडि पनि सवारी पास दिने नाममा जिल्ला प्रशासन कार्यालयहरुले अनावश्यक भीड बढाएका थिए ।