गाउँपालिकाले बाड्यो विपन्नलाई सेनिटाइजर, साबुन र मास्क

२० चैत, तनहुँ । आँबुखैरेनी गाउँपालिका कार्यालयले गाउँपालिकाका विपन्न परिवारका दुई सय घरधुरीलाई दुई सय थान सेनिटाइजर, दुई सय साबुन र एक हजार थान मास्क वितरण गरेको छ । नेपाली कांग्रेसका केन्द्रीय सदस्य एवं पूर्वमन्त्री शंकर भण्डारी, गाउँपालिकाका अध्यक्ष गिरबहादुर थापा, कांगे्रस आँबुखैरेनी गाउँ कार्यसमिति र नेपाल तरुल दल आँबुखैरेनी एकाइका वरिष्ठ उपाध्यक्ष अभियान श्रेष्ठको संयुक्त सहयोगमा उक्त सामग्री वितरण गरिएको हो । यसअघि आँबुखैरेनी–३ स्थित कोट गाउँ र भाँगे गाउँमा सेनिटाइजर, साबुन र मास्क वितरण गरी नमूना खत्री टोल र प्रगति टोलमा कोरोना भाइरस नियन्त्रण तथा रोकथामका लागि डिसइन्फेक्टेण्ट स्प्रे गरिएको थापाले बताए ।

त्यसैगरी आँबुखैरेनी–३ निवासी अभियान श्रेष्ठले आँबुखैरेनीभित्रका विपन्न परिवारका २५० घरधुरीलाई सेनिटाइजर, डिटोल साबुन र मास्क वितरण गरेका छन् । कोभिड–१९को संक्रमणबाट बच्न तथा बचाउनका लागि आँबुखैरेनी–३, आँबु गाउँका ५० घरधुरीलाई ५० थान सेनिटाइजर, ५० थान डेटोल साबुन र २०० थान मास्क वितरण गरिएको तरुल दल आँबुखैरेनी एकाइका वरिष्ठ उपाध्यक्ष श्रेष्ठले बताएका छन् ।