नयाँ वर्षमा पहाडी क्षेत्रमा हुरीबताससहित पानी पर्ने

३० चैत्र, काठमाडौं । जल तथा मौसम पूर्वानुमान महाशाखाका अनुसार नयाँ वर्षको दिन भोलि ‘सोमबार’ पहाडी क्षेत्रको थोरै ठाउँमा मेघगर्जन र हुरीबतास सहित क्षणिक वर्षाको सम्भावना रहेको छ ।

पश्चिमी वायुको आंशिक प्रभावले भोलि पहाडी क्षेत्रको मौसम आंशिक देखि सामान्य बदली भइ थोरै ठाउँमा मेघगर्जन र हुरीबतास सहित क्षणिक वर्षाको सम्भावना रहेको मौसमी बुलेटिनमा उल्लेख गरिएको छ ।

महाशाखाले आइतबार बिहान जारी गरेको बुलेटिन अनुसार मध्य तथा पूर्वी पहाडी क्षेत्रको तुलनामा पश्चिमी पहाडी क्षेत्रमा अलि धेरै पानी पर्नेछ । आजलाई भने पहाडी क्षेत्रको एक र दुई ठाउँमा दिउँसोपछि एकैछिन पानी पर्ने सम्भावना रहेको पनि उनले बताए। तर एक ठाउँमा पानी परे पनि नजिकै अर्को ठाउँमा पानी नपर्न पनि सक्नेछ ।

यो प्रिमनसुन अर्थात मनसुनअघिको मौसमको विशेषता हो । आज देशको पूर्वी भू-भागमा सामान्य बदली रहि बाँकी भू-भागमा मौसम सामान्यतया सफा रहेको छ । तराईको मौसम भने सामान्यतया सफा नै रहने छ ।

चैत्र  ३० गते (आईतबार)

दिउँसोः देशको पहाडी भू-भागमा आँशिक बदली रही  बाँकी भू-भागमा  मौसम सामान्यतया सफा रहने छ। अपरान्ह पछि पहाडी  भू-भागका एक-दुई स्थानमा मेघगर्जन/चट्याङसहित क्षणिक वर्षाको सम्भावना रहेको छ।

रातीः  देशको पहाडी  भू-भागमा आँशिक बदली  रही बाँकी भू-भागमा  मौसम सामान्यतया सफा रहने छ।

बैशाख १ गते (सोमबार)

दिउँसोः देशको पहाडी भू-भागमा आँशिक देखि सामान्य बदली  रही बाँकी भू-भागमा आँशिक बदली  रहने छ। पश्चिमी पहाडी भू-भागका थोरै स्थानहरुमा साथै मध्य तथा पूर्वी पहाडी भू-भागका एक-दुई स्थानमा मेघगर्जन/चट्याङसहित क्षणिक वर्षाको सम्भावना रहेको छ।

रातीः  देशको पश्चिमी भू-भागमा आँशिक देखि सामान्य बदली  रही बाँकी भू-भागमा आँशिक बदली  रहने छ।

बैशाख २ गते (मंगलबार)

दिउँसोः  देशभर आँशिक देखि सामान्य बदली  रहने छ। पहाडी भू-भागका केहि स्थानहरुमा मेघगर्जन/चट्याङ र हावाहुरीसहित वर्षाको सम्भावना रहेको छ।

रातीः  देशको पहाडी भू-भागमा आँशिक देखि सामान्य बदली  रही बाँकी भू-भागमा आँशिक बदली  रहने छ। पहाडी भू-भागका थोरै स्थानहरुमा मेघगर्जन/चट्याङ र हावाहुरीसहित वर्षाको सम्भावना रहेको छ।

आगामी २४ घण्टाका लागि चेतावनी तथा परामर्श 

देशको  पहाडी भू-भागका एक-दुई स्थानमा अपरान्ह पछि मेघगर्जन/चट्याङसहित क्षणिक वर्षा हुन सक्ने  देखिएकोले सामान्य सतर्कता अपनाउन हुन अनुरोध छ |