प्रधानमन्त्रीमा अल्पज्ञान, अहंकार र भयंकरको कक्टेल देखिएको भट्टराईको आरोप

६ जेठ, काठमाडौं । पूर्वप्रधानमन्त्री डा. बाबुराम भट्टराईले प्रधानमन्त्री केपी शर्मा ओलीलाई कडा आक्षेप लगाएका छन् । आज बसेको प्रतिनिधिसभा बैठकमा प्रधानमन्त्री ओलीले सम्बोधन गरेलगत्तै नवगठित जनता समाजवादी पार्टीका नेता डा। भट्टराईले फेरि कडा प्रतिक्रिया दिएका हुन् । डा. भट्टराईले प्रधानमन्त्रीमा अल्पज्ञान, अहंकार र भयंकरको कक्टेल देखिएको आरोप लगाएका छन् ।

अध्यादेशमार्फत् आफ्नो पार्टी फुटाउने खेलमा लागेका ओलीप्रति डा. भट्टराई यसअघिदेखि नै खनिँदै आएका छन् । नीति तथा कार्यक्रममाथि उठेका प्रश्नको मंगलबार प्रतिनिधिसभामा प्रधानमन्त्रीले दिएको जवाफ सुनेलगत्तै भट्टराईले यस्तो प्रतिक्रिया दिएका हुन् । प्रधानमन्त्रीमा कमी कमजोरी स्वीकार्ने र सच्चिने कुनै छाँटकाँट नदेखिएको भट्टराईले बताएका छन् । ‘लिपुलेक नक्साको ब्याज भजाएर अकंटक कुशासन चलाउने र देशलाई बर्बादीमा लैजाने बुझियो’ उनले टिप्पणी गरेका छन् ।

सरकारले आजै संसदमा प्रस्तुत भएको आगामी आर्थिक वर्ष २०७७/ ७८ को नीति तथा कार्यक्रम बहुमतले पारित गरेको छ । मंगलबार बसेको प्रतिनिधिसभा बैठकले गत जेठ २ गते राष्ट्रपति विद्यादेवी भण्डारीले संसदको दुवै सदनमा संयुक्त रुपमा प्रस्तुत गरेको नीति तथा कार्यक्रम आजको बैठकले पारित गरेको हो । सांसदहरु दुर्गा पौडेल, प्रेम सुवाल, मिनेन्द्र रिजाल, लक्ष्मणलाल कर्ण र सरिता गिरीले नीति तथा कार्यक्रम संशोधन गर्न माग गरे पनि आज बहुमतले पारित भएको छ ।

बहुमतले नीति तथा कार्यक्रम पारित भएकाले यसमा भएका व्यवस्था संशोधन हुने छैनन् । यसकै आधारमा अर्थ मन्त्रालयले बजेट बनाइरहेको छ । विभिन्न राजनीतिक दल र नेताहरुले सरकारको नीति तथा कार्यक्रम प्रभावकारी नभएको भन्दै आलोचना गर्नै आइरहेका थिए । राष्ट्रपति विद्यादेवी भण्डारीले जेठ २ गते संघीय संसदको दुवै सदनको संयुक्त बैठकमा सरकारको नीति तथा कार्यक्रम प्रस्तुत गरेकी थिइन् ।