कोरोना संक्रमितको शव लैजाँदा शवदाह गृहमा भागाभाग

१५ जेठ, काठमाडौं । कोरोना संक्रमित भएर ज्यान गएकाको शब अन्त्येष्टिका लागि लैजाँदा काठमाडौंको पशुपतिनाथस्थित शवदाह गृहमा कर्मचारीको भागाभाग भएको छ । बिहीबार साँझसम्म शव जलाइरहेका उनीहरु कोरोनाका कारण मृत्यु भएका व्यक्तिको शव ल्याउने बेलामा शव दाह गृहमा ताल्चा लगाएर भागेका हुन् ।

ललितपुरस्थित किस्ट अस्पतालमा बुधबार साँझ मृत्यु भएका बुङ्मतीका एक पुरुषलाई दाह संस्कारका लागि शव लैजाँदा शवदाह गृह बन्द थियो । अस्पतालबाट मृतक पुरुषको शवलाई विश्व स्वास्थ्य संगठनको नियम पालना गरेरै लगिएको थियो ।

तर शव दाह गृहमा कर्मचारी नभएपछि अर्को घाटबाट कर्मचारी ल्याई उनीहरुलाई प्रहरीले व्यक्तिगत सुरक्षा सामग्री पीपीई दिएपछि शव जलाउने प्रक्रिया सुरु भएको थियो । यद्यपि, पशुपति क्षेत्र विकास कोषका सदस्य सचिव प्रदीप ढकालले भने शव दाहगृह बन्द नभएको दाबी गरे ।

यसअघि कोरोना संक्रमित सिन्धुपाल्चोककी महिलाको पनि शव दाहगृहमै शव अन्त्येष्टि गरिएको थियो । नेपालमा संक्रमितको संख्या बढ्दै गएपछि जताततै कोरोना त्रास पनि फैलिन थालेको छ ।