नेपालमा कोरोनाका कारण सातौ व्यक्तिको मृत्यु

१७ जेठ, दैलेख । कोरोना भाइरसका कारण नेपालमा सातौ व्यक्तिको मृत्यु भएको छ । दैलेखको दुल्लु नगरपालिकामा रहेको क्वारेन्टिनमा मृत्यु भएका युवकको कोरोना भाइरसको परीक्षण गर्दा रिपोर्ट पोजेटिभ आएपछि नेपालमा कोरोनाले ज्यान गुमाउनेको संख्या ७ पुगेको हो ।

तीन दिनअघि युवकको स्वाब परीक्षणको लागि कर्णाली स्वास्थ्य विज्ञान प्रतिष्ठान जुम्लामा पठाइएको थियो। तर रिर्पोट नआइपुग्दै उनको मृत्यु भएको थियो । कर्णाली प्रदेशको सामाजिक विकास मन्त्रालय अन्तर्गतको स्वास्थ्य महाशाखा प्रमुख डा लक्ष्मी नारायण तिवारीले दैलेखका युवाको मृत्यु कोरोनाबाट भएको पुष्टि गरे ।

मृत्तक दुल्लु नगरपालिका–११ का ३५ वर्षीय युवक हुन । भारतबाट १० दिनअघि आएका उनको अचानक मृत्यु भएपछि कोरोनाको आशंका गरिएको थियो । यसअघि सिन्धुपाल्चोक, बाँके, गुल्मी, पर्सा, ललितपुर र अर्घाखाँचीमा एक एक जनाको ज्यान गइसकेको छ ।