नगरपालिका गैह्रजिम्मेवार बन्दा क्वारेन्टाइन व्यवस्थापन अस्तव्यस्त, १८ जनामा कोरोना पोजिटिभ

२९ जेठ, स्याङ्जा । गल्याङ नगरपालिकाको क्वारेन्टाइनमा बसेकामध्ये १८ जनामा कोरोना पोजिटिभ रिर्पोट आएको छ । गल्याङ बहुमुखी क्याम्पसको क्वारेन्टाइनमा बसेका ४८ जनाको गत जेठ २१ गते र ६ जनाको २४ गते स्वाब संकलन गरिएको थियो । १८ जनामध्ये २ जना सरसफाईकर्मी समेत रहेका छन् । गत साता नगरपालिकाले क्वारेन्टाइन व्यवस्थापनमा हेलचक्रयाइ गरि दुषित पानी खुबाएको तथा सामाजिक दुरी कायम नभएको, खानपान राम्रो नभएको भन्दै आन्दोलनमा उत्रेका नागरिकहरुमा संत्रास थपिएको हो ।

भारत तथा तेस्रो मुलुकबाट भित्रने मानिसहरुलाई कोरोना संक्रमणको परिक्षण नहुने बेलासम्म राख्ने व्यवस्था गरिएका क्वारेन्टाइनहरुको व्यवस्थापनमा स्याङ्जाको गल्याङ नगरपालिकाले चासो नदिदाँ अस्तव्यस्त बनेको छ । क्वारेन्टाइनमा बस्ने मानिसहरुलाई शुद्ध खानेपानी, शौचालय र बसाईमा कठिनाई भएपछि अस्तव्यस्त बनेको हो ।

स्याङ्जाको गल्याङ नगरपालिका यतिबेला निकै चर्चामा छ । नगर स्वास्थ्य इकाई शाखाका प्रमुखले आत्महत्या गरेपछि यो नगरपालिका निकै चर्चामा रहेको हो । कर्मचारीलाई उच्च आत्मबल बढाएर काम गर्नुपर्ने यो महामारीमा स्वास्थ्य प्रमुखले आत्महत्या गर्नुले नगरपालिकाको व्यवस्थापन पक्ष निकै कमजार रहेको आंकलन स्थानीयहरुले गरेका छन् । त्यसमा पनि विदेशबाट आउने मानिसका कारण समुदायमा कोरोना संक्रमण नफैलियोस भनेर निमार्ण गरिएका क्वारेन्टाइनहरु अस्तव्यस्त हुदा गल्याङ् नगरपालिकामा सन्त्रास फैलिएको छ ।

गण्डकी प्रदेश र प्रदेश नम्वर ५ को सीमानामा रहेको गल्याङ् नगरपालिकाले यस्ता विषयमा चासो दिन नसकेको गुनासो आएपछि स्याङ्जाका प्रमुख जिल्ला अधिकारीको नेतृत्वमा गत आइतबार अनुगमन गरिएको थियो । प्रमुख जिल्ला अधिकारी गंगाबहादुर क्षेत्रीकै अगाडी क्वारेन्टाइनमा बसेका मानिसहरुले सुविधा नपाउँदा थप कोरोना संक्रमणको शिकार हुनुपर्ने अवस्था सिर्जना भएको गुनासो गरेका थिए । नगरपालिकाका जनप्रतिनिधिहरु गैह्र जिम्मेवार हुदाँ समस्या भोग्न बाध्य भएको उनीहरुले प्रजिअलाई गुनासो पोखेका थिए ।

भारतबाट बल्ल बल्ल आफ्नै नगरपालिका आएका छौं क्वारेन्टाइनमा बसेका एक युवकले प्रजिअलाई भने,“सीडीयो साप ! हामीलाई खानेपानी र शौचालयको समस्या भयो, पटक पटक गुनासो गर्दा पनि सुनुवाई भएन ।” कोरोना संक्रमणबाट बच्न सामान्य विधि पनि अपनाउने वातावरण नगरपालिकाले गरिदिएन, उनले भने । गल्याङ नगरपालिका १ मालुङ्गास्थित सार्वजनिक माध्यमिक विद्यालयको क्वारेन्टाइनमा बस्ने भारतबाट आएका मानिसहरुले स्याङ्जाका प्रजिअलाई गुनासो पोख्दै भने, महिला मैत्री क्वारेन्टाइन नहुँदा क्वारेन्टाइनमा बस्ने महिलाहरुलाई समेत समस्या देखिएको छ ।

प्रमुख जिल्ला अधिकारी क्षेत्रीले तपाईहरुको समस्याको सम्वोधन तत्काल समाधान गर्न नगरपालिकालाई आग्रह गर्ने छु भनेर सम्झाए । यस्तो समस्या आउनु निकै दुखद हो प्रजिअ क्षेत्रीले भने,“नगरपालिकाले क्वारेन्टाइनमा बस्ने मानिसको उच्च मनोबल बढाउनु आवश्यक छ ।” सामान्य समस्यालाई नगरपालिकाले सम्वोधन नगर्नु गैह्र जिम्मेवारपन देखियो, यसलाई सुधार्नुपर्छ,उनले भने । गल्याङ् नगरपालिकामा भारतबाट आएका करिब २ सय नागरिक क्वारेन्टाइनमा बस्दै आएका छन् । गल्याङ् बहुमुखीमा बसेका नागरिकले त आन्दोलन नै गरेका थिए । धमिलो पानी खुवाएको र सम्मानजनक व्यवहार नभएको भन्दै आन्दोलन भएको थियो ।

भारत लगायत तेस्रो मुलुकबाट आउने मानिसहरुलाई विद्यालय र क्याम्पसमा निर्माण गरिएको क्वारेन्टाइनमा राखिएको छ । नगरपालिकाको व्यवस्थापनमा लापरवाही भएपछि क्वारेन्टाइनमा बसेका मानिसहरुले आन्दोलन समेत गर्न बाध्य भएका थिए । अहिलेसम्म गल्याङ् नगरपालिकामा करिब २ सयको संख्यामा भारतबाट आएका मानिसहरु क्वारेन्टाइनमा बसेका छन् । ५४ जनाको पीसीआर समेत गरिएकोमा आज १८ जनामा पाेजिटिभ आएकाे छ । पीसीआर रिर्पोटमा एकैचाेटी १८ जनामा पाेजिटिभ देखिएपछि क्वारेन्टाइनमा बसेका मानिसहरुमा संत्रास सिर्जना भएको बताइएको छ । दुई प्रदेशको सीमानाका भएकाले व्यवस्थापनमा निकै कठिन भएको गल्याङ नगर प्रमुख भुपराज अधिकारीले बताए । आफ्ना नागरिकलाई क्वारेन्टाइनमा राखेपनि उनीहरुको आत्मबल बढ्ने गरी सेवा सुविधाबाट बन्चित गरिनु हुदैन । यसतर्फ नगरपालिकाले बेलैमा सचेत बन्नु आवश्यक छ ।