साह सेवा सदनको स्तरोन्नतीको लागि पहिलो तल्लाको छत ढलान सम्पन्न

धीरुभाइ

३१, जेठ सप्तरी । सप्तरीको राजविराज स्थित साह सेवा सदनको स्तरोन्नतीको कार्य अगाडी बढाइएको छ । दुई दशक अघिदेखि सामाजिक सेवामा सेवारत सदनलाई आधुनिकीकरणका लागि स्तरोन्नती कार्य अन्तर्गत छत ढलान सम्पन्न गरेको छ ।

सदनको एक तल्ला थप गरेर आधुनिक सुविधा सम्पन्न बनाउनको लागि पहिलो तल्लाको छत ढलान सम्पन्न गरेको हो । प्रदेश २ का सभा सदस्य नेत्रविक्रम साहको संसद विकास कोषबाट विनियोजित जनश्रमदान बाहेक ४९ लाख २५ हजारको लागतमा एक हलसहित १० कोठाको छत ढलान सम्पन्न भएको सदनका अध्यक्ष दुर्गाप्रसाद साहले जानकारी दिए ।

पूर्वाधार विकास कार्यालय सिरहा, सम्पर्क इकाइ कार्यालय राजविराजले पहिलो तल्लाको नौ वटा कोठा, एउटा सानो हल, शौचालयको पर्खाल जडान, झ्याल ढोकामा चोकस जडानसहित कूल ५४ लाख ७२ हजार, ७७८ रुपैयाको लागतमा स्तरोन्नती कार्य भइरहेको इन्जिनियर किशोरकुमार साहले जानकारी दिए ।

कोरोना भाइरस संक्रमण विरुद्ध जारी लकडाउनका कारण विकासीय निर्माण कार्य प्रभावित भइरहेको थियो । सरकारले विकासीय निर्माण कार्यलाई अगाडी बढाउन लकडाउनमा लचकता अपनाइएको कारण असार १५ भित्र आयोजना सम्पन्न हुने गरी २०७६ चैत ९ गते सम्झौता भएको सदनका कोषाध्यक्ष कामेश्वर साहले बताए ।

साह सेवा सदनको छत ढलान कार्यको प्रदेश २ का भूमी व्यवस्था, कृषि तथा सहकारी मन्त्री शैलेन्द्रप्रसाद साह, सभा सदस्य नेत्र बिक्रम साह लगायत सदनका पदाधिकारी, समाजका अगुवा, विभिन्न राजनैतिक दलका नेताहरुले अवलोकन र निरीक्षण गरेका थिए ।