अब काठमाडौं बाहिर जान ५ रुपैयाँको फारम भर्नुपर्ने !

१४ असार, काठमाडौं । कोरोना महामारी बढेका बेला सरकारले काठमाडौं उपत्यका बाहिर जानेका लागि नयाँ नियम बनाएको छ । अब उपत्यका बाहिर जानेले सरकारी निवेदन दिएर सवारी पास पाउनेछन ।

जिल्ला प्रशासन कार्यालय काठमाडौंले सवारी पास पाउन अबदेखि निवेदकले कार्यालयले जारी गरेको ढाँचाअनुसार निवेदन दिनुपर्ने बताएको छ । ढाँचामा यात्रुहरूको नाम, उमेर, स्थायी ठेगाना र सम्पर्क नम्बर लेख्नुपर्नेछ। जाने स्थान, जाने मिति, सवारी धनीको नाम, चालकको नाम पनि उल्लेख गर्नुपर्छ।

कार्यालयले जारी गरेको ढाँचा सेवाग्राही आफैंले प्रिन्ट गरी निवेदनसहित दिनुपर्नेछ। उक्त ढाँचा कुनै स्टेशनरी पसलबाट प्रिन्ट गरी बेच्नु परेमा ५ रूपैंयाँभन्दा बढी नलिन पनि कार्यालयले आग्रह गरेको छ।

निवेदनका साथमा जानु पर्ने स्थानीय तहको सिफारिश वा यात्रा प्रयोजन खुल्ने कागजातको फोटोकपीसमेत समावेश गर्नुपर्ने कार्यालयले जनाएको छ।

यसअघि सरकारले उपत्यका बाहिर जाने र आउनेलाई निकै कडाई गरेको थियो । तर अहिले लकडाउन खुलेपछि सरकारले सवारी पासमा केही खुकुलो तर पूर्ण विवरण माग गरेको छ ।