तृप्ती मेमोरियल अस्पतालद्धारा स्वास्थ्य सुरक्षा उपकरण वितरण

◊ धीरुभाइ

१९ असार सप्तरी । तिलाठी कोइलाडी गाउँपालिकाका अध्यक्ष सतिशकुमार सिंहले दिनानुदिन बढ्दै गएको कोरोना भाइरसको संक्रमणप्रति आम जनमानस सचेत हुनु आवश्यक रहेको बताएका छन् । तृप्ती मेमोरियल नाक, कान तथा घाँटी अस्पताल तिलाठीद्वारा स्वास्थ्यकर्मीलाई ब्यक्तिगत सुरक्षा उपकरण वितरण कार्यक्रममा बोल्दै अध्यक्ष सिंहले सो कुरा बताउका हुन् ।

कोरोना भाइरसको संक्रमणबाट जोगिन ब्यक्तिगत सतर्कता अपनाउनु नै सबैभन्दा उत्तम विकल्प भएको उनले बताए । कार्यक्रमका अस्पतालका अध्यक्ष डा. अनिल कुमार झाले कोरोना भाइरसको संक्रमण दिनदिनै बढ्दै गएकोले सावधानी अपनाउनुका साथै सामाजिक दुरीलाई ख्याल गर्नु अति आवश्यक भएको बताए ।

कार्यक्रममा तिलाठी कोइलाडी गाउँपालिका वडा नं. १ का अध्यक्ष दिनेश्वर मिश्र, अस्पतालका उपाध्यक्ष तथा आर्ट अफ लिभिङ्गका निर्देशक ईन्जिनियर किशार कुमार झा लगायतकाले मन्तब्य ब्यक्त गरे । सोही अवसरमा तिलाठी कोइलाडी गाउँपालिकाको स्वास्थ्य शाखाका स्वास्थ्यकर्मी तथा आठ वटै स्वास्थ्य संस्था प्रमुख, छिन्नमस्ता गाउँपालिकाको वरही विरपुर र लोखरम स्वास्थ्य संस्था, राजविराज नगरपालिका वडा नं. १३ र १५, भारदह अस्पताल र बरमझिया स्वास्थ्य संस्थालाई ब्यक्तिगत सुरक्षा उपकरण, साबुन र मास्क वितरण गरिएको अस्पतालका मनोज कुमार झाले बताए ।

कार्यक्रममा भारदह अस्पतालका डा. अनिल कुमार रजकले ब्यक्तिगत सुरक्षा उपकरण (पीपीई) लगाउने र फुकाल्ने तरिका बारे जानकारी गराए ।