गजेन्द्र नारायण अस्पतालका दुई कर्मचारीसहित १४ जनामा संक्रमण

◊ धीरुभाइ

७ साउन, सप्तरी । राजविराज स्थित गजेन्द्र नारायण सिंह अस्पताल र अस्पताल परिसरका पुर्नस्थापना केन्द्रका एक÷एक कर्मचारीसहित सप्तरीमा बुधबार १४ जनामा कोरोना भाइरस संक्रमण पुष्टि भएको छ । यससँगै जिल्लामा संक्रमितको संख्या ४०४ पुगेको छ ।

बुधबार पुष्टि भएका संक्रमित भएका १३ जना मृतक संक्रमितसँगको सिधा सम्पर्कमा आएका व्यक्ति र ती व्यक्तिका पारिवारिक सदस्य भएको स्वास्थ्य कार्यालय सप्तरीका निमित्त प्रमुख दुनियालाल यादवले बताए । अस्पतालका कर्मचारीहरुको पनि मृतक संक्रमितसँगको सम्पर्कमै रहेको बताए ।

आज राजविराज ३ का ६३ र ३२ वर्षिय पुरुष, राजविारज ७ का २० वर्षिय पुरुष, राजविराज ६ का ४० वर्षिय पुरुष, राजविराज ३ का २३ वर्षिय पुरुष, राजविराज ६ का ३६ वर्षिय महिला, राजविराज २ का ३१ वर्षिय पुरुष, राजविराज ६ का ३२ वर्षिय महिला, राजविराज ६ का ४३ वर्षिय पुरुष, राजविराज ७ का ४०, १७, १५ र १५ वर्षिय महिला तथा अग्निसाईर कृष्णसवरण गाउँपालिका १ का एक पुरुषमा संक्रमण भेटिएको जिल्ला स्वास्थ्य कार्यालय सप्तरीका शर्मिलाकुमारी चौधरीले जानकारी दिए।

मृतक संक्रमितसँगको सम्पर्कबाट २२ जनामा संक्रमण फैलिएको स्वास्थ्य कार्यालय सप्तरीका निमित्त प्रमुख यादवले बताए । कन्ट्याक्ट ट्रेसिङ्गको आधारमा हालसम्म करिब एक सय जनाको स्वाब संकलन गरिएको उनले बताए ।

तीमध्ये २३ जनाको रिपोर्ट आइसकेको छ भने अन्यको रिपोर्ट आउन बाँकी रहेको बताइएको छ । जिल्लामा समुदाय स्तरसम्म संक्रमण फैलिएको उनको दाबी छ । तर, सो सम्बन्धमा जिल्ला संकट व्यवस्थापन समितिले निर्णय भने गरेको छैन ।