कैलालीमा बाढीले बगाउँदा ४ जना बेपत्ता

१५ साउन, कैलाली । अविरल बर्षापछि आएको बाढीले बगाउँदा कैलालीमा चार जना बेपत्ता भएका छन् । जानकी गाउँपालिका–२ का ५४ वर्षीय कोबी सुनार, भजनी नगरपालिका–८ का सोनाफाटाका ११ वर्षीय स्केल चौधरी, सोही ठाउँका ४० वर्षीय ईश्वर शाही र ३२ वर्षीय चक्र बिक बेपत्ता भएका हुन् ।

कैलालीका प्रमुख प्रहरी उपरीक्षक अनुपम शमशेर जबराका अनुसार काँडा, पर्थैया, कान्द्रा र मोहोना नदीमा आएको बाढीको भेल बस्तीमा पस्दा उनीहरुलाई बेपत्ता बनाएको हो । बाढीले बगाएका अरु तीन जनाको सकुशल उद्धार गरिएको थियो । बेपत्ताको खोजी भइरहेको प्रहरीले जनाएको छ ।

बर्षापछि आएको बाढीले कैलालीका ६ हजार भन्दा बढी घर डुबानमा परेका छन् । बाढीका कारण डुबानमा परेकाहरुको बिचल्ली भएको छ ।