लकडाउनले पर्यटन बोर्डका ४३ कर्मचारीको जागिर गयो

१८ साउन, काठमाडौं । पर्यटनमन्त्री योगेश भट्टराईले भनेजस्तै पर्यटन बोर्डले करारमा नियुक्त कर्मचारी कतौती गरेको छ । यस वर्ष झण्डै ६ महिना कमाइविहीन बनेको बोर्डले ४३ जना कर्मचारीको करार नवीकरण नगरेको हो ।

यसअघि नै पर्यटनमन्त्री भट्टराईले काम नगर्ने कर्मचारीलाई हटाउने भन्दै आएका थिए । त्रिभुवन विमानस्थलबाट विदेशी जाने प्रत्येक हवाई यात्रुबाट नेपाल पर्यटन बोर्डले एक हजार रुपैयाँ उठाउने गरेको थियो ।

यसबाट उठेको रकम नै बोर्डको मुख्य आम्दानी हो । यसबाहेक पदयात्रामा जाने पर्यटकलाई दिइने टीम्सकार्ड बिक्री समेत बोर्डको आम्दानीको स्रोत हो । पर्यटक आगमन बन्द भएपछि बोर्ड आम्दानीविहीन हुँदा कर्मचारी हटाइएको हो ।

बोर्डमा सरसफाइ र भान्सामा काम गर्ने केही कर्मचारीबाहेक सबै करारका कर्मचारीलाई बोर्डले नवीकरण नगर्दा उनीहरु हटाइएको हुन् ।