तस्करीकाे हरियो मटरसहित मिनीट्रक नियन्त्रणमा, तस्कर साह फरार

२२ साउन, मोरङ । अवैध रुपमा भारततर्फ चोरी निकासी गर्दै गरेको करिब ५ लाख रुपैयाँ मूल्य बराबरको ६ हजार २ सय ५० केजी हरियो मटरसहित को.१ ख ४८८७ नम्बरको मिनीट्रकलाई धनपालथान गाउँपालिका-२ पौठाबाट बुधबार राति प्रहरीले नियन्त्रणमा लिएको छ ।

उक्त स्थानमा हरियो मटरको अवैध रुपमा चोरी निकासी भइरहेको भन्ने खबर प्राप्त हुनासाथ सीमा प्रहरी चौकी मायागंजबाट खटिएको प्रहरीलाई देखेर मिनीट्रक नै छाडेर चालक फरार भएपछि प्रहरीले उक्त ट्रकसहितको सामान नियन्त्रणमा लिएको हो ।

बरामद हरियो मटरसहितको ट्रक आवश्यक कारवाहीको लागि मूल भन्सार कार्यालय रानी, विराटनगरमा बुझाउने कार्य भइरहेको जिल्ला प्रहरी कार्यालय मोरङले जनाएको छ ।

उक्त हरियो मटर धनपालथान गाउँपालिका-२ बस्ने दीलिप साहको रहेको प्रारम्भिक अनुसन्धानबाट खुल्न आएको छ । हाल फरार दीलिप साह र मिनी ट्रकका चालकको प्रहरीले खोजी गर्नुका साथै थप अनुसन्धान गरिरहेको छ ।