पहिरोले बालकको मृत्यु, बृद्ध गम्भिर घाइते !

२५ साउन, बाजुरा । बाजुराको गौमुल गाउँपालिका–४ डाँडाबाडा भैंसी छाना गुवानीमा पहिरोमा पुरिएर एक बालकको मृत्यु भएको छ । ६० बर्षीय बृद्ध भने गम्भिर घाइते भएका छन् । पहिरोमा परेर १२ बर्षीया अनिश विश्वकर्माको मृत्यु भएको हो भने ६० बर्षीय भीम विश्वकर्मा गम्भिर घाइते भएका छन् ।

आईतबार बिहान सुतिरहेको बेला पहिरो आएको हो । गुवानी भन्ने लेकमा भैंसी गोठ छाना माथिबाट पहिरो आएको हो । पहिरोमा परेर ४ बाख्रा र एक गोरु मरेका छन् ।

स्थानीय समेत नभएको र विकट लेकमा भएका कारण उद्दारको समस्या छ । स्थानीयमार्फत भएपनि उद्धारको प्रयास भइरहेको गौमुल गाउँपालिकाका अध्यक्ष हरि बहादुर रोकायाले जानकारी दिएका छन् ।