चितवनका स्थानीय तहमा निषेधाज्ञा, माडी शिल !

३२ साउन, चितवन । चितवनका स्थानीय तहमा निषेधाज्ञा जारी गरिएको छ । कोरोनाको संक्रमण बढ्दै गएपछि जिल्ला प्रशासन कार्यालय चितवनले जिल्लाका ६ वटा स्थानीयमा तहमा निषेधाज्ञा जारी गरेको हो ।

प्रमुख जिल्ला अधिकारी नारायणप्रसाद भट्टराईका अनुसार माडी बाहेकका स्थानीय तहमा भदौ ५ गतेसम्म लागि निषेधाज्ञा जारी गरिएको हो । भरतपुर महानगरपालिकामा साउन ३० गते शुक्रबार राति १२ बजेदेखि नै निषेधाज्ञा जारी गरिएको छ । पूर्वी चितवनका कालिका, रत्ननगर खैरहनी र राप्ती नगरपालिकासँगै इच्छाकामना गाउँपालिकामा आइतबार राति १२ बजेदेखि निषेधाज्ञा जारी गरिएको हो ।

प्रशासनले आइतबार एक सूचना जारी गर्दै स्थानीय प्रशासन ऐन २०२८ को दफा ६ को उपदफा ३ बमोजिम निषेधाज्ञा लागु गरिएको जनाएको छ । माडी नगरपालिका क्षेत्रमा भने नगरपालिका स्वयंमले माडी प्रवेश गर्ने मुख्य नाका सिल गरेको छ ।