कञ्चनपुरमा उच्च ज्वरोले ४ जनाको मृत्यु

११ भदौ, कैलाली । कञ्चनपुरमा यसै हप्ता ४ जनाको मृत्यु भएको छ । महाकाली नगरपालिकामा पछिल्लो १० दिनमा उच्च ज्वरो आएर ४ जनाको मृत्यु भएको नगरपालिकाको स्वास्थ्य कार्यालयले जनाएको छ ।

‘ज्वरो आएपछि नगरपालिकाको सम्पर्कमा पुगेका ८ जनामध्ये ४ जनाको मृत्यु भएको स्वास्थ्य शाखा प्रमुख जयबहादुर महराले बताए । अरु ४ जनाको भने अस्पतालमा उपचार भइरहेको छ ।

मृत्यु भएका अधिकांशलाई १ सय डिग्री भन्दा बढी ज्वरो रहेको पनि उनको भनाई छ । यद्यपी उनीहरुको कोरोना परीक्षण गरिएको थिएन । महाकाली अस्पताल र कैलालीको सेती प्रादेशिक अस्पताल लगेपछि उपचारकै क्रममा मृत्यु हुँदा पनि कोरोना परीक्षण नगर्नु लापरबाही ठानिएको छ ।