स्वास्थ्यकर्मीको पनि तलब रोकियो, सुरक्षाकर्मीलाई जस्तै पीडा !

१९ भदौ, काठमाडौं । कोरोना रोकथाम तथा बिरामीको उपचारमा खटिएका खटिएका स्वास्थ्यकर्मीको तलब रोकिएको छ । वीर अस्पतालका कर्मचारीले साउन महिनाको तलव पाउन नसकेको बताएका छन् ।

डा. भोविन्द्र कार्कीले सामाजिक सञ्जालमा फेसबुकमा गुनासो पोखेका छन् । भत्ता दिने नाममा तलब नै नदिएको उनको गुनासो छ । कोरोनाको कारण देखाउँदै आफ्नो तलब नहालिएको डाक्टरको गुनासो छ ।

सरकारले ९ चैत २०७६ मा कोभिड–१९ संक्रमणको पहिचान, रोकथाम, नियन्त्रण तथा उपचार कार्यमा संलग्न जनशक्तिलाई जोखिम भत्ता उपलब्ध गराउने निर्णय गरेको थियो ।

स्वास्थ्य तथा जनसंख्या मन्त्रालयले तयारी पारेको भत्ता व्यवस्थापनसम्बन्धी आदेशमा सबैभन्दा जोखिमपूर्ण क्षेत्रमा कार्यरत जनशक्तिले पारिश्रमिकको शत प्रतिशत भत्ता पाउने उल्लेख छ । वीर अस्पताल, जनस्वास्थ्य प्रयोगशाला पाटन र त्रिवि शिक्षण अस्पतालमै कोरोना संक्रमितको उपचारमा खटिएका स्वास्थ्यकर्मी नै उक्त भत्ताबाट वञ्चित छन् ।