लिड्समाथि लेस्टरको प्रभावशाली जित

१८ कार्तिक, एजेन्सी । ईङ्लिस प्रिमियर लिग फुटबलमा लेस्टर सिटीले शानदार जित हात पारेको छ । लिड्स युनाईटेडमाथि लेस्टरले शानदार जित निकालेको हो । सोमबार राति लेस्टरले लिड्सलाई ४–१ गोल अन्तरले पराजित गरेको हो ।

लेस्टरको जितमा यूरी टाइलेमेनले दुई तथा जेमी भार्डी र हार्वे बार्न्सले एक–एक गोल गरे । जितसँगै लेस्टर लिग तालिकाको दोस्रो स्थानमा उक्लिएको छ । लगातार चार खेलमा जित निकाल्दै लेस्टरले ७ खेलबाट १५ अंक जोडेको छ । शीर्ष स्थानको लिभरपुलको १६ अंक छ । लिड्स १० अंक सहित १२ औं स्थानमा छ ।