प्रचण्डका अंगरक्षकलाई पक्षघातः उपचार नपाएर अवस्था गम्भीर, सहयोगको अपिल

२६ कार्तिक, काठमाडौं । सत्तारुढ नेपाल कम्युनिस्ट पार्टी (नेकपा) का अध्यक्ष प्रचण्डका अंगरक्षक तुलबहादुर घर्ती ‘मुनाल’ को पक्षघातका कारणले स्वास्थ्य अवस्था गम्भीर भएको छ । जनयुद्धका क्रममा प्रचण्डको सुरक्षामा रातदिन खटिएका मुनाले उपचार नपाएर घरमै सिकिस्त अवस्थामा भएको परिवारले जनाएका छन् । पश्चिम रुकुमको त्रिवेणी गाउँपालिका–५ जवाङस्थित आफ्नै घरमा मर्नु न बाँच्नुको अवस्थामा उनी यतिबेला बेसाहारा भएका छन् ।

जनयुद्धकालको चर्चित चुवाङ बैठकमा प्रचण्ड, मोहन वैद्य, बाबुराम भट्टराई, बादलहरु लगायतका नेताहरुको सुरक्षाको जिम्मा लिएका मुनालले उपचार नपाएर छटपटिरहँदा कसैले पनि सहयोग गरेका छैनन् । उपचार नपाएरै मुनालको ज्यान जाने अवस्थामा पुगेको परिवारले जनाएका छन् ।

मुनालको उपचारका निम्ती पूर्वमाओवादीका नेता तथा सामाजिक अभियान्त हेमबहादुर खड्काको नेतृत्वमा काठमाडौंको संवाद डबलीमा सहयोग अपिल कार्यक्रममार्फत सत्तासिन नेता तथा आम मनकारी जनसाधारण समक्ष सहयोगका लागि अपिल गरिएको छ ।

देशको परिवर्तनका खातिर आफ्नो शरीर जर्जर बनाउने मुनालजस्ता सयौं साथीहरुको सहयोगका लागि आफूहरुले मुनालबाट अभियान सुरु गरेको बताए । अभियान्ता खड्काले अगाडि भने, “जनयुद्धमा हेडक्वार्टरका नेताहरुको रक्षा गर्ने मुनालजस्ता सयौं कमरेडहरु बेसाहारा भएका छन्, उहाँहरुको रक्षा कसले गर्ने ?”

कार्यक्रममा बोल्दै खड्काले आफूहरु बिहिबार नै उपचारका लागि रुकुम जाने र मुनाललाई काठमाडौंमा ल्याएर उपचार गर्ने योजना रहेको जानकारी समेत दिए । जसका निम्ति आमरुपमा सहयोग गर्न उनले अपिल गरेका छन् ।

सहयोगको लागि शान्ति नेपालको नाममा रहेको ग्लोबल आईएमई बैंक लिमिटेड, पानीपोखरी शाखाको खाता नम्बर ३३०१०१००००७६५ मा जम्मा गरिदिनुहुन अनुरोध गरिएको छ ।