कोरोना परीक्षण गर्दै हुनुहुन्छ ? सरकारी परिचय पत्र खोई ?

७ मंसिर, काठमाडौं । सरकारले कोरोना परीक्षण गर्न सरकारी परिचय पत्र अनिवार्य बनाएको छ । स्वास्थ्य तथा जनसंख्या मन्त्रालयले कोरोना भाइरसको परीक्षणमा सरकारी परिचय पत्र अनिवार्य गर्न निर्देशन दिएको हो ।

मन्त्रालयको इन्सिडेन्ट कमाण्ड सिस्टम आईसीएसले स्वाब संकलन गर्दा परिचय पत्र हेर्न निर्देशन दिएको हो । विदेश यात्राका लागि पीसीआर परीक्षण गर्दा सम्बन्धित व्यक्तिको पहिचानका लागि बायोमेट्रिक वा यस्तै अन्य प्रणाली अवलम्बन गर्न पनि अनिवार्य गरिएको छ ।

साथै नेगेटिभ वा पोजेटिभ यकिन नभएको रिर्पोट आएमा पोजेटिभ मान्न र लोअर डिटेक्सन युनिट उल्लेख गर्न निर्देशन दिइएको छ । सबै प्रयोगशालाले क्वालिटी कन्ट्रोलको प्रोटोकल बनाउन लागू गर्न पनि भनिएको मन्त्रालयले जनाएको छ । पछिल्लो समय कोरोना भाइरसको परीक्षणमा लापरवाही दोहोरिएपछि सरकारले सरकारी परिचय नै अनिवार्य गरेको हो ।