कोदालोको पासो प्रहारबाट गयो नाबालकको ज्यान, हत्यारा प्रहरी नियन्त्रणमा

४ पुष, स्याङ्जा । हरिनास गाउँपालिका ५ आग्रीडाँडामा एक नाबालकको कुटाईबाट मृत्यु भएको छ । ३६ बर्षिय रेशमबहादुर राना मगरले जाँडको तालमा कोदालोको पासोले प्रहार गर्दा सोही ठाँउका १४ बर्षिय बालक शेरबहादुर थापाको घटनास्थलमै मृत्यु भएको प्रहरीले जनाएको छ ।

जिल्ला प्रहरी कार्यालय स्याङ्जाका प्रवक्ता एवं प्रहरी नायब उपरीक्षक राजेन्द्र अधिकारीले नेपालबहसलाई दिएको जानकारी अनुसार प्रहरी घटनास्थल पुगी हत्यारालाई नियन्त्रणमा लिईसकेको छ ।

ईलाका प्रहरी कार्यालय मग्याचिसापानीबाट असईको नेतृत्वमा प्रहरी टोली घटनास्थल पुगीसकेकोले स्थिति नियन्त्रणमा रहेको उनले जनाए ।जिल्लाबाट ईन्सपेक्टरको नेतृत्वमा थप टोली पठाइसकिएको बताउँदे अधिकारीले भने, “घटना किन र कसरी भयो भन्ने बारे बिस्तृत अनुसन्धानपछि मात्र थाहा हुनेछ ।”

प्रहरीसँगको प्रारम्भिक बयानमा हत्यारा राना मगरले आफुले के सुरमा हाने भन्ने नै थाहा नभएको बयान दिएका छन् । यसअघि पनि सोही गाउँका युवाहरु र हरिनाश ६ हटियाका युवाहरुको क्याक्मी बलिकोटमा झडप हुँदा आग्रीडाँडाका एक युवाको घट्नास्थलमै मृत्यु भएको थियो ।