ओली नै अन्योलमा, चुनावी सरकार केयरटेकर कि फुलफ्जेज्ड ?

८ पुष, काठमाडाैं । प्रधानमन्त्री केपी ओलीले विभिन्न जालझेल गरेरै भएपनि संसद विघटन त गराए, तर उनलाई आफैं विश्वास छैन कि सर्वाेच्च अदालतले यसलाई सदर गर्ला भनेर । किनभने संविधानमा हुँदै नभएको अधिकार प्रयोग गरेका छन् उनले । यसबारे उनलाई निकट कानूनविज्ञहरुले नसुझाएको पनि होइन । तर आफूलाई रातो दिन कचकच गर्ने पुष्पकमल दाहाल ‘प्रचण्ड’ र नेता माधवकुमार नेपाललाई तह लगाउनै भएपनि असंवैधानिक कदम चाले ।

त्यसैले ओलीले संसद भंग गर्ने सिफारिश गर्दा प्रधानमन्त्रीबाट राजीनामा गरेनन् । नेपालको संसदीय अभ्यासलाई हेर्ने हो भने यसअघि भएका सबै विघटनको सिफारिशसँगै प्रधानमन्त्रीले राजीनामा दिएका छन् । तर ओलीले त्यसो गरेनन् । किनभने उनलाई थाहा छ, संसद फेरि ब्यूतिने छ ।  ब्यूतिएको संसदमा उनी फेरि प्रधानमन्त्रीकै हैसियतमा रहन चाहन्छन् । ओेलीले पछिल्लो अवस्थामा आफूलाई नेकपाकै आधिकारिक अध्यक्षका रुपमा देखाउन खोजेको कारण पनि त्यही हो ।

हिजो मात्रै आफू पक्षीय केन्द्रीय कमिटी बैठक बोलाएर उनले ५५६ जना नयाँ सदस्य थपे । साथै, थपिएका केन्द्रीय सदस्यलाई शपथ गराएर सूची निर्वाचन आयोगमा बुझाए । उनी चाहन्छन्, आधिकारिक पार्टी मेरै हो । प्रचण्ड र नेपाल भने आफैं विभाजित भएर गएका हुन् । साथै, पार्टीको आधिकारिक चुनाव चिन्ह् सूर्य उनले नै दाबी गर्ने छन् । यसको सबै तयारी भइसकेको छ । प्रमुख निर्वाचन आयुक्त दिनेशकुमार थपलिया ओलीका भित्रिया हुन् । उनले त्यसको सबै चाँजोपाँजो मिलाउने छन् । थपलियालाई सघाउ पुर्याउन थप दुई कम्रेड उनले संवैधानिक परिषदमा सिफारिश गरिसकेका छन् ।

आफू सबैतिरबाट सुरक्षित रहने गरी ओली अगाडि बढिरहेका छन् । कदाचित संसद व्युँतियो भने उनी कांग्रेससँग मिलेर सरकार बनाउने पक्षमा छन् । त्यसको भित्री तयारी उनले गरेको देखिन्छ । कांग्रेस सभापति शेरबहादुर देउवाको कार्यशैली र व्यवहारले त्यस्तो आशंकालाई पुष्टी गरिरहेको छ ।

हिजोदेखि सुरु भएको कांग्रेस केन्द्रीय कार्यसमिति बैठकमा नेताहरुले यस्तै छनक दिएका छन् । असन्तुष्ट पक्ष ओलीको गैरसंवैधानिक निर्णयको डटेर विरोध गर्नुपर्ने तर्क दिइरहेको छ भने संस्थापन पक्ष चाहिं लोकतान्त्रिक पार्टीले चुनावको विरोध गर्न नहुने दलिल पेश गरेको छ । कांग्रेस भित्रको यो अन्तद्र्वन्द्वले कस्तो बाटो अख्तियार गर्छ, त्यसैमा देशको राजनीतिक कोर्ष भर पर्छ ।