युवती प्रयोग गरी फिल्मीशैलीमा लुट्ने गिरोह सक्रिय

८ पुष, काठमाडौं । महानगरीय प्रहरी अपराध महाशाखाले फिल्मी शैलीमा लुट्ने गिरोहका एक सदस्यलाई पक्राउ गरेको छ । कलंकी जाने भनेर मोटरसाइकलमा लिफ्ट मागेकी युवतीले चोभार पुर्‍याई लुटपाटमा संलग्न गिरोहका नाईके पक्राउ परेका छन् ।

गत साउन ८ गते भोलाबहादुर जर्घामगर रत्नपार्कबाट मोटरसाइकलमा कलंकी जान लागेका थिए । सिन्धुली कमलामाई नगरपालिका २ का उनलाई त्यसबेलै एक युवतीले लिफ्ट मागिन् ।

युवतीले उनलाई कलंकी पुर्‍याइदिन भनिन् र भोलाबहादुरले युवतीलाई कलंकी पुर्‍याइदिए । युवतीले फेरि अनुरोध गर्दै फेरि भोलालाई चोभारसम्म पुर्‍याइदिन अनुरोध गरिन् । भोलाबहादुर पनि युवतीको अनुरोध मानेर चोभार पुगे ।

तर, चोभार पुग्दा त्यहाँ अन्य दुईजना युवा बसिरहेका थिए । त्यहाँ पुगेपछि भोलालाई नियन्त्रणमा लिए । उनीहरूले भोलाको साथमा रहेको ६ तोला सुनको सिक्री, मोबाइल, चश्मा र सात हजार रुपैयाँ लुटेको महानगरीय प्रहरी अपराध महाशाखा प्रमुख एसएसपी दिपक थापाले बताए ।

लुटेसँगै युवती लिएर उनीहरू फरार भएका थिए । नाटकीय लुटपाटपछि भोलाबहादुर महानगरीय अपराध महाशाखामा उजुरी गर्न आएको थापाको भनाई छ ।

त्यही उजुरीको आधारमा महाशाखाले एक जनालाई पक्राउ गरेको छ । पक्राउ पर्नेमा दोलखाको शैलुङ गाउँपालिका ३ घर भई काठमाडौं स्युचाटार बस्ने ४९ वर्षीय लालबहादुर श्रेष्ठ रहेको महाशाखाले जनाएको छ ।

घटनामा संलग्न युवती र अन्य व्यक्तिहरूको खोजी भइरहेको परिसर प्रमुख एसएसपी दीपक थापाले जानकारी दिए । पक्राउ परेका श्रेष्ठलाई आवश्यक कारबाहीको लागि महानगरीय प्रहरी परिसर ललितपुरमा बुझाइएको उनले बताए ।