ओलीको पद अस्वीकार गर्नेहरु बढ्दै

९ पुष, काठमाडौं । पार्टी विभाजनको क्रममा प्रधानमन्त्री केपी ओली गुटले अनेक टिकडम गरेर केन्द्रीय कमिटी संख्या बढायो । ११९९ जना रहने जम्बो महाधिवेशन आयोजक कमिटी भन्दै मौजुदा कमिटीमा ५५६ जना तत्कालै सदस्य थपिए ।

यति गरेपछि निर्वाचन आयोगमा नामाबली पठाइएपछि पार्टीको आधिकारिकता पाउने विश्वास ओली पक्षलाई छ । किनभने प्रमुख निर्वाचन आयुक्त दिनेशकुमार थपलिया ओलीका भित्रिया हुन् । यस्तै भर्खरै संवैधानिक परिषदमार्फत दुई जनालाई आयुक्त सिफारिश गरिएको छ । यिनै आधारमा ओली पक्ष ढुक्क छ– पार्टीको आधिकारिकता पाइन्छ भन्नेमा ।

नभन्दै आयोगको गतिविधि र काम गर्ने तौरतरिकाले यस्ता आशंकालाई बल मिलेको छ । दुनियाँले जेसुकै भनुन् तर आयोगले निर्लज्ज ढंगमा ओली पक्षलाई पार्टीको आधिकारिकता र चुनाव चिन्ह् दियो भने अनौठो नमाने हुने अवस्था छ ।

त्यही आधारमा केही समय कतै नखुलेका गृहमन्त्री रामबहादुर थापा ‘बादल’ अन्ततः ओली पक्षमा जान राजी भए । बादललाई लाग्यो– अब सबै प्राप्ति ओलीसँगै रहँदा मात्रै हुने छ । त्यसैले होला आफ्ना सेनामेना छाडेरै भएपनि बादल ओली कित्तामा पुगेका छन् । तर केही नेताहरु भने ओलीको लालचबाट प्रभावित हुन सकेनन् । ओलीले केन्द्रीय सदस्य थपेका कतिपयले ठाडै अस्वीकार गरेका छन् ।

उनले नियुक्त गरेकामध्ये दुई दर्जनले त पद लिन अस्वीकार गरिसकेका छन् भने यो बढ्ने क्रममा रहेको देखिन्छ । साथै, केही प्रभावशाली नेताहरु पनि ओली समूह छाडेर मूल प्रवाहमै लागेका छन् । यस्तो सूचीमा पूर्वमन्त्री शेरबहादुर तामाङ र पत्नी उषाकिरण राई मात्र होइन ।

ओलीले बनाएका केन्द्रीय सदस्यहरुमध्ये अस्वीकार गर्नेहरु लोकप्रिय नेताहरु रहेको बताइन्छ । जसमा ताप्लेजुङका डम्बरसिंह सम्बाहाम्फे , प्रदेश नं. १ का सामाजिक मामला राज्यमन्त्री जसमाया गजमेर, रुपन्देहीका नेत्र पन्थी, गुल्मीका गगन विष्ट लगायत रहेका छन् ।