ओलीविरुद्ध प्रचण्ड–माधवको विशाल जुलुस, राजधानीको ट्राफिक ठप्प

९ माघ, काठमाडौं । प्रधानमन्त्री केपी ओलीको सिफारिशमा राष्ट्रपति विद्यादेवी भण्डारीले गरेको प्रतिनिधिसभा विघटनको विरोधमा प्रचण्ड–माधव समूहले आज राजधानीमा विशाल विरोधसभा भईरहेको छ । अहिले राजधानीका अधिकांश ठाउँमा जुलुस निकालिएका छन् ।

नेकपा प्रचण्ड–माधव समूहले आज राजधानीमा दुुई लाख मानिस उतार्ने तयारी गरेका हुन् । यतिबेला जताततै जुलुस देखिएको छ । त्यसको प्रभावले राजधानीको ट्राफिक अस्तव्यस्त बनेको छ ।

उक्त समूहका अध्यक्षद्वय पुष्पकमल दाहाल ‘प्रचण्ड’ र माधवकुमार नेपाललगायत शीर्ष नेताहरु यतिबेला सडक प्रदर्शनमा सहभागी भएका छन् । विहान ११ बजेबाट जुलुस निकाल्ने भनिएपनि साढे ९ बजेदेखि नै राजधानीका सडक अस्तव्यस्त भएका थिए ।

काठमाडौ र पाटनबाट जुुलुस निकालिएका छन् । विभिन्न स्थानबाट निकालिएका जुलुसको नेतृत्व स्थायी कमिटी सदस्यहरुले गरेका छन् ।जुलुस रत्नपार्कतिर बढेको छ । रत्नपार्कमा भेला भएर बागबजार, पुतलीसडक, प्रदर्शनी मार्ग, भद्रकाली, शहिदगेट, सुन्धारा, भोटाहिटी, पुरानो बसपार्क हुँदै भृकुटीमण्डपमा पुगी विरोधसभामा परिणत हुनेछ ।