तातोपानी नाकाबाट दैनिक २० कन्टेनर सामान आउने, व्यवसायी थाले सामान भित्राउन

२८ माघ, काठमाडौं । तातोपानी नाका संचालनमा आएको छ । चिनियाँ व्यापारिक नाका तातोपानी अन्तर्गत मितेरी पुल निर्माण गर्न गत माघ ७ गतेदेखि बन्द गरिएको उक्त नाका मंगलबारदेखि संचालनमा आएको हो ।

नाका संचालन भएको पहिलो दिनमै दुई देशबीचको व्यापारिक कारोबार सुरु भएको छ। नाका संचालनमा आएलगत्तै कन्टेनरको संख्या बढेर आउने तातोपानी भन्सार कार्यालयका जनाएको छ ।

मंगलबार मात्र भन्सारमा ६ नेपाली कन्टेनर सामान भित्रिएको छ । बुधबार आज पनि ८ वटा कन्टेनर आउने कार्यालयले जनाएको छ । पुल निर्माण अघि नाकामा रोकिएको कन्टेनर भन्सारमा भित्र्याएर मात्र बन्द गरिएको थियो । त्यस समयमा भन्सारमा ३ महिनामा करिब ७ सय २८ कन्टेनर भित्रिएको थियो।

केही कन्टेनर बाँकी रहेकोले आगामी २ दिन उक्त कन्टेनरहरु आउने भन्सारले जनाएको छ । नाकामा रोकिएको पुरानो कन्टेनर आएपछि तातोपानी भन्सारमा दैनिक २० कन्टेनर आउने निर्णय भएका छन् ।

यसका लागि चिनियाँले ४० वटा कन्टेनर पठाउन सक्ने तयारी गरेको भन्सारले जनाएको छ । तातोपानी भन्सारमा हाल ४८ वटा ट्रलीमात्र रहेकोले दैनिक १६ वटा देखि २० वटा सम्म आउने व्यवस्था गरेको भन्सार जनाएको छ ।

पुल निर्माणपछि दुइ देशबीचको ब्यापारिक कारोबारमा असर हुन नदिनका लागि जति सक्दो बढी कन्टेनर सामान पठाउने सहमति भएको छ।

कहिलेदेखि नयाँ सामान आउने

व्यवसायीहरुले आगामी आइतबारदेखि चिनियाँ सामानहरु नयाँ अर्डर गर्ने सक्ने भएका छन् । गत वर्ष माघदेखि कोभिडका कारण नाका समय समयमा मात्र खुलिरहेको थियो । त्यसकारण चिनियाँ नाकामा एक हजार भन्दा बढी कन्टेनर रोकिएका थिए । व्यवसायीहरुले पुरानो सामान नआउँदा नयाँ सामान अर्डर गर्न पाएका थिएनन् ।

भन्सार अनुसार २ दिनमा पुरानो कन्टेनर नेपाल भित्रिएपछि तातोपानी नाका पुरानो लयमा फर्कने छ । यो बर्ष चिनियाँ नयाँ बर्ष लोसारमा पनि नाका बन्द नहुने भएको छ । गत बर्ष लोसारको समयमा २० देखि एक महिनासम्म नाका बन्द हुने गरेको थियो ।

हाल कोभिडका कारण आयात निर्यात प्रभाव भएकोले लोसारको समयमा चिनियाँ र नेपाली नाका दुबै खुल्ला हुने भएको छ । उक्त दिनमा सामान नआएपनि पहिले जस्तो नाका पुरै बन्द नगर्ने बताएको छ ।

तातोपानी नाका एकतर्फी मात्रै खुल्ने

तातोपानी नाका पूर्ण रुपमा खुले पनि एकतर्फी रुपमा मात्र हुने भएको छ । कोभिडको संक्रमण नियन्त्रण नभएकोले हालको लागि नाकामा आयातमात्र गर्ने व्यवस्था भएको हो ।

यस नाकाबाट एक बर्षदेखि सामान निर्यात भएको छैन । तातोपानी नाकाबाट स्वादेशी सामान निर्यात गर्ने सम्बन्धी भने हालसम्म कुनै छलफल नभएको पनि प्रमुख खत्रीले बताए।