नेता गंगादत्त जोशीको निधनमा डा. कोईरालाद्वारा समवेदना व्यक्त

२९ माघ, काठमाडौं । नेपाली कांग्रेस कञ्चनपुरका संस्थापक नेता गंगादत्त जोशीको हृदयघातका कारण मृत्यु भएको छ । ८५ वर्षीया नेता जोशीको बुधबार बिहान कञ्चनपुर जिल्लाको महेन्द्रनगर स्थित आफ्नै घरमा निधन भएको हो ।

परिवार स्रोतका अनुसार नेता जोशी आफ्नो आँखाको नियमित उपचारका लागि गेटा अस्पताल जान आफ्नै नातिनीको स्कुटीमा चढ्ने क्रममा अचानक हृदयघात भई आँगनमै ढलेका थिए । जोशीलाई तत्काल उपचारका लागि महाकाली अञ्चल अस्पताल पुर्याईएपनि अस्पतालले उनको निधन भएको घोषणा गरेको कांग्रेस कञ्चनपुरका सभापति हरिप्रसाद बोहोराले बताए ।

२०५५ सालमा राष्ट्रिय सभाको सदस्य रहेका जोशीलाई यस अघि पनि हृदयघात भएको थियो । २०५९ मा नेपाली कांग्रेस कञ्चनपुरका सभापति रहेका जोशीको शव आज श्रद्धाञ्जलीका लागि दिउँसो २ बजेसम्म पार्टी कार्यालयमा राखेर आजै दाहसंस्कार गरिने नेपाली काङ्ग्रेस कञ्चनपुरले जनाएको छ ।

नेता जोशीको निधन प्रति नेपाली काङ्ग्रेसका प्रभावशाली नेता डा. शेखर कोईरालाले गहिरो दुःख व्यक्त गरेका छन् । कोईरालाले शोक वक्तब्यमा भनेका छन् :– नेपाली कांग्रेस कञ्चनपुरका पुर्व सभापति एवं पुर्व सांसद गंगादत्त जोशीको हृदयघातबाट निधन भएको खबरले स्तब्ध बनाएको छ । ूशोकाकुल यस समयमा समस्त जोशी परिवारमा हार्दिक समवेदना र स्व. गंगादत्त जोशीलाई श्रद्धाञ्जली ।