सुदूरपश्चिम प्रदेश फुटबल लिगको आज उद्घाटन

२९ माघ, काठमाडौं । कैलाली–कञ्चनपुरमा प्रथम सुदूरपश्चिम लिग प्रतियोगिताको आज उद्घाटन हुने भएको छ ।

सुदूरपश्चिम प्रदेश फुटबल संघको आयोजनामा कञ्चनपुरको महेन्द्रनगर र कैलालीको धनगढीमा प्रथम सुदूरपश्चिम फुटबल लिग प्रतियोगिता हुने भएको हो । अखिल नेपाल फुटबल संघ (एन्फा)को कार्यतालिका अनुरुप २०७६ सालका जिल्ला लिग च्याम्पियन दुवै जिल्लाका उत्कृष्ट टीमबीच प्रतिस्पर्धा हुनेछ ।

उद्घाटन खेल महेन्द्रनगरको खुला मञ्च र समापन धनगढीमा हुने आयोजकले जनाएको छ । सुदूरपश्चिम प्रदेश फुटबल संघका महासचिव अमृत शाहले गतवर्षको लिग च्याम्पियन टीमबीच खेल हुने बताए । नेशनल लिगको तयारीका लागि टीम छनौट जस्तै खेल हुने बताउँदै महासचिव शाहले जिल्लाबाट विजेता टिमले ‘एन्फा प्रिन्सिडेन्ट कप’मा सहभागि हुन पाउनेछ ।

कञ्चनपुरबाट दिपज्योती युवा क्लब र कैलालीबाट निसर्ग स्टारसिटी युवा क्लबबीच ‘होम एण्ड अवेय’ प्रतियोगिता हुनेछ ।सुदूरपश्चिम प्रदेश फुटबल संघका अध्यक्ष दिनेश श्रेष्ठले एन्फामा आवद्ध भएका जिल्लाबाट मात्रै प्रतियोगिता गराएर टीम छनौट गरिने बताए ।