किन बस्दै छ, प्रचण्ड–माधव समूहको लगातार बैठक ?

७ फागुन, काठमाडौं । प्रधानमन्त्री केपी ओलीले हठात् प्रतिनिधिसभा विघटन गरेपछि विकसित राजनीतिक घटनाक्रमले सबैभन्दा बढी प्रभावित तुल्याएको प्रचण्ड–माधव समूह अस्तित्व रक्षाको लडाईंमा होमिएको छ । झण्डै दुईतिहाई सदस्य आफ्नो पक्षमा भएपनि पार्टीको आधिकारिकता र चुनाव चिह्न उसले पाउन लगभग नसक्ने स्थिति रहेको छ ।

त्यसले गर्दा यो समूहको राजनीतिक भविष्य नै दाउमा लागेको छ । यद्यपि आफ्नो पक्षको मनोबल उँचो बनाउन भेला बैठक र कार्यक्रम भने निरन्तर गरिरहेका छन् । प्रचण्ड–माधव समूहले आजैपनि श्रृखलाबद्ध मिटिङ राखिरहेको छ ।

पार्टी केन्द्रीय कार्यालय पेरिसडाँडामा आज बिहान पार्टी स्थायी कमिटी बैठक बस्यो । साथै, दिउँसो २ बजे केन्द्रीय कमिटी बैठक डाकेको छ । बैठकमा सबै सदस्यहरुलाई नागरिकता प्रमाणपत्रको सक्कलै लिएर उपस्थित हुन भनिएको छ । लगत्तै साँझ संसदीय दलको समेत बैठक डाकिएको छ ।

यसरी निरन्तर बैठकको श्रृँखला चलाएर प्रचण्ड–माधव समूह प्रधानमन्त्री ओलीलाई कमजोर बनाउन लागेको छ । खासगरी पार्टीको आधिकारिकता र चुनाव चिह्न नै नदिएर निर्वाचन आयोगले देखाएको व्यवहारप्रति यो समूह आक्रमक बन्ने देखिएको छ । केन्द्रीय सदस्यहरुको नागरिकतासहित आयोगमा प्रस्तुत हुने तयारीसमेत रहेको बुझिएको छ ।