नख्खुदोबाटोमा जिपको ठक्करबाट किशोरीको मृत्यु, अस्पतालअगाडि प्रदर्शन

१९ फागुन, ललितपुर । ललितपुरको नख्खुदोबाटोमा जिपको ठक्करबाट क्याम्पस जान लागेकी किशाेरीको मृत्यु भएको छ। विहान सवा ५ बजे बाटो काट्दै गरेकी सिन्धुपाल्चोक घर भइ बागडोल बस्ने १९ वर्षीया अन्जु दाहाललाई स १ ज ५६७ नम्बरको फोर्स गाडीले ठक्कर दिएको हाे ।

उनी कोटेश्वर बहुमुखि क्याम्पसमा अध्ययनरत विद्यार्थी हुन्। क्याम्पस जान लागेकी उनलाई जिपले ठक्कर दिँदा उनको मृत्यु भएको  प्रहरीले जनाएकाे छ ।

ठक्करपछि उनको उपचारको लागि ग्वार्कोस्थित बिएन्डबी अस्पताल लग्ने क्रममा बाटाेमै मृत्यु भएको थियो। प्रहरीले जीप र चालक प्रविण गिरीलाई नियन्त्रणमा लिएको छ। मृतकका आफन्तहरूले राहत र दोषीमाथि कारबाहीको माग गर्दै अस्पतालअगाडि प्रदर्शन गरिरहेका छन्।