कञ्चनपुरमा प्रहरी र तस्करबीच भिडन्त, गोली लागेर भारतीय तस्करकाे मृत्यु

२० फागुन, काठमाडौं । कञ्चनपुरमा प्रहरी र तस्करबीच भिडन्त भएको छ । बेलौरी नगरपालिका–७ मा भिडन्त हुँदा प्रहरीको गोली लागेर एक जनाको मृत्यु भएको छ ।

गस्तीमा गएका प्रहरीलाई तस्करले फायर गरेपछि जवाफी फायर गरिएको सुदुरपश्चिम प्रदेश प्रहरीले जनाएको छ । प्रहरीको गोली लागेर घाइते भएका भारतीय तस्कर समूहका एक जनाको उपचारका लागि अस्पताल लैजादै गर्दा मृत्यु भएको हो ।

जिल्ला प्रहरी कार्यालय कंचनपुरका अनुसार प्रहरीले मुठभेडका क्रममा ठूलो मात्रामा ब्राउनसुगर पनि बरामद गरेको छ । यस्तै, प्रहरीले नक्कली नोट छाप्न प्रयोग हुने मेसिन पनि बरामद गरेको छ।

मुठभेडका क्रममा प्रहरी जवान वीरबहादुर साउद घाइते भएका छन्। उनको दाैडने क्रममा खुट्टामा चाेट लागेको छ। अन्य तीन जना भने साथीलाई गाेली लागेपछि भागेको प्रहरीले जनाएको छ।

ब्राउनसुगरका कारोबारी नेपालतर्फ आइरहेको सूचनाका आधारमा प्रहरी पुगेको थियो। अहिले त्यहाँ प्रहरीले सर्च अपरेसन चलाइरहेको छ।प्रहरीलाई देखेपछि लागुऔषध कारोबारीले गोली चलाएको जवाफी कारबाहीका क्रममा भारतीय नागरिकको मृत्यु भएको छ ।