गज्जबको संयोग, जन्मदिनको उपहार– माधवमाथि गतिलो प्रहार !

२३ फागुन, काठमाडौं । विचित्रको संयोग नै मान्नुपर्छ, पूर्व नेकपा एमालेका दुई शीर्ष नेताको यो वर्षको जन्मदिन राजनीतिक रुपले भने सकसपूर्ण बन्न पुग्यो । आज सर्वाेच्च अदालतले नेकपा भन्ने पार्टीको नाम ऋषि कट्टेललाई दिने निर्णय गर्दा माधवकुमार नेपालको जन्मदिन परेको छ ।

सर्वाेच्चको यो निर्णयले उनको राजनीतिक भविष्य एकपटक फेरि पूर्व एमाले अध्यक्ष केपी ओलीको हातमा पुगेको छ । आज जन्मदिनमै यस्तो फैसला भएपछि धेरैले यसअघि फागुन ११ गते सर्वाेच्चले प्रतिनिधिसभा पुनस्थापना गर्दाको क्षण स्मरण भएको छ । उक्त दिन ओलीको जन्मदिन परेको थियो । आज नेपाल जस्तै त्यो दिन ओलीका निम्ति दुखद बन्न पुगेको थियो ।

सर्वाेच्चको आजको फैसलाले नेपालको राजनीतिक परिदृश्य नै नयाँ दिशातर्फ अग्रसर भएको छ । आजको फैसलालाई ओली पक्षले आफ्नो राजनीतिक जितका रुपमा व्याख्या गरेका छन् । परराष्ट्रमन्त्री प्रदीपकुमार ज्ञवालीले अब पार्टी एकीकरणलाई नयाँ शीराबाट लैजाने अवसर प्राप्त भएको टिप्पणी गरेका छन् ।

यस्तै अर्थमन्त्री विष्णु पौडेलले पनि अदालतको फैसलाको सम्मान गर्ने बताएका छन् । तर प्रचण्ड–माधव पक्षमा भने यो फैसलाले भूँइचालो नै गएको छ । वदलिएको परिस्थितिमा कसरी प्रस्तुत हुने भनेर अहिले यो समूह बैठकमा जुटेको छ । सिंहदरबारमै अहिले यो समूहको सचिवालय बैठक सुरु भएको छ ।