राष्ट्रपतिको सर्वदलीय बैठक खनाल, नेपाल र डा. भट्टराईद्धारा बहिष्कार

३ चैत, काठमाडौं । जब जब प्रधानमन्त्री केपी ओली राजनीतिक संकटमा फस्छन् त्यतिखेर शीतलनिवासको सकृयता ह्वात्तै बढ्छ । यतिबेला प्रधानमन्त्री ओलीको पद धरापमा परेकोछ, अनि राष्ट्रपति विद्यादेवी भण्डारीको चासो पनि चुलिएको छ ।

यसै मेसोमा आज अपरान्ह् ४ बजे राष्ट्रपति भण्डारीले सर्वदलीय बैठकको आयोजना गरेकीछन् । उनको यो बैठकको राजनीतिक अर्थ के हो भन्ने धेरैलाई ज्ञात भएकै हो । राष्ट्र र जनताप्रति भन्दा प्रधानमन्त्रीप्रति राष्ट्रपतिको रुचि र झुकाव धेरै रहेको छ ।

राष्ट्रपति भण्डारीको पछिल्लो कार्यशैली र व्यावहारप्रति आम नागरिक तहमा समेत असन्तुष्टी थपिएको छ । उनले अभिभावकीय भूमिका निर्वाह गर्न नसक्दा देशले ठूलो जोखिम मोल्नुपरेको आरोप राजनीतिक बृत्तबाटै लाग्न थालेको छ । त्यसैले आजको बैठकमा दलका नेताहरु जाने की नजाने भन्नेमा वहस र विवाद खडा भएको छ ।

नेकपा एमालेका नेताद्वय झलनाथ खनाल र माधवकुमार नेपालले आफूहरु बैठकमा नजाने प्रष्ट पारेका छन् । विगतमा अध्यादेश जारी गर्दा होस् वा प्रतिनिधिसभा विघटन प्रकरणमा होस् राष्ट्रपति भण्डारीले अभिभावकीय भूमिका निर्वाह नगरेको भन्दै पूर्व प्रधानमन्त्री डा. बाबुराम भट्टराई पनि बैठकमा नजाने जानकारी दिएका छन् ।

उता, माओवादी केन्द्र पनि वैठकमा जाने नजाने भन्ने विषयमा प्रष्ट भइसकेको छैन । पोलिटव्यूरो सदस्य हरिबोल गजुरेल भन्छन्–देशको लागि नभई ओलीको संकट मोचनका लागि बोलाइएको सर्वदलीय बैठकमा जानुको कुनै अर्थ रहँदैन । तर पार्टीले भने औपचारिक रुपमा कुनै निर्णय गरिनसकेको उनले बताएका छन् । विवादास्पद बनेको सर्वदलीय बैठकमा रहने सहभागिता र राखिने धारणालाई बढो चासोका साथ हेरिएको छ ।