चन्द्रागिरीको शेयरमा बुधबार पनि सर्किट, ११ सय ७५ पुग्यो शेयरमूल्य ?

काठमाडौं । चन्द्रागिरी हिल्सको आईपीओ सूचीकृत भएको करिब डेढ महिना पुग्न लागेको छ । यसबीच नेपाल स्टक एक्सचेन्जमा २७ दिन शेयर कारोबार भएको छ । यो अवधिमा चन्द्रागिरी हिल्सको दोस्रो बजारमा कारोबार मूल्य दिनहुँ उकालो लागिरहेको छ ।

नेप्सेमा माघ ५ मा सूचीकृत भएपछि चन्द्रागिरीको पहिलो कारोबार माघ ७ मा १६१ रुपैयाँबाट सुरु भएको थियो । त्यसयता कुनै एक दिन पनि यस्तो छैन जुन दिन यस कम्पनीको शेयर मूल्य बढेर सर्किट ब्रेकर नलागेको होस् । यसरी सूचीकरणको एक महिनाभन्‍दा बढी अवधि पार हुँदा पनि सबै कारोबार दिनमा लगातार सर्किट ब्रेकर लाग्ने सम्भवतः पहिलो कम्पनी पनि हो चन्द्रागिरी ।

यसबीच करिब एक महिनामा यस कम्पनीको मूल्य १०७५ प्रतिशतले वृद्धि भइसकेको छ । लो ओपनिङ रेन्ज पाएको भएपनि त्यसयता शेयर बजार समग्रम झन्डै साढे दुई सय अंकले तल झरिसकेको अवस्थामा समेत चन्द्रागिरीको मूल्य बढेको बढ्यै प्रतिकित्ता ११७५ रुपैयाँ पुगिसकेको छ ।

१०० रुपैयाँ अंकित दरको सेयरलाई बजारमा कारोबार गराउन नेप्सेले ९६ रुपैयाँसम्म मूल्य तय गरेको थियो। कम्पनीको प्रतिशेयर नेटवर्थ अनुसार दोस्रो बजारमा तीन गुणासम्म मूल्य तोक्न पाइन्छ।

चन्द्रागिरीको प्रति सेयर नेटवर्थ नै ९६ रुपैयाँ आसपास भएकाले उसको दोस्रो बजारको कारोबार मूल्य पनि ९६ रुपैयाँदेखि नै तोकिएको थियो। कम्पनीले नै नेटवर्ट आर्थिक वर्ष २०७८/७९ पछि मात्रै सय रुपैयाँमाथि जाने प्रक्षेपण गरेको छ।

तैपनि कम्पनीको सेयर मूल्य निरन्तर उक्लिरहेको छ। कम्पनीको पहिलो दिनको कारोबार प्रति कित्ता १६१ रुपैयाँका दरले भएको थियो। कारोबारको २७औं दिन अर्थात आज (बुधबार) ९.९२ प्रतिशत बढेर प्रति कित्ता ११ सय ७५ रुपैयाँका दरले किनबेच भइरहेको छ। कम्पनीको सेयर मूल्य एकै दिन १०६ रुपैयाँले बढेको हो।

पाँच दिनयता मात्रै कम्पनीको शेयर एक हजार कित्तामाथि कारोबार भइरहेको छ। त्यसअघि हजार कित्ताभन्दा कम मात्रै कारोबार भइरहेको थियो। ब्रोकरहरुका अनुसार, सर्वसाधारणले भन्दा पनि चन्द्रागिरिको सेयर म्युचुअल फण्ड कम्पनीहरुले उठाइरहेका छन्।

निक्कै नै छरिएको शेयर अहिले पनि दोस्रो बजारमा १० कित्ताकै दरमा बिक्रीमा आइरहेको छ। खरिदकर्ताले अहिलेसम्म बिक्रीमा नराखेका कारण १० कित्ताकै दरमा कारोबार भइरहेको छ। मंगलबारसम्म २२ हजार ८६४ कित्ता शेयर खरीदबिक्री भएको छ।