आवश्यक परे सरकारको नेतृत्व गर्न कांग्रेस तयार : लेखक

९ चैत, काठमाडौं । नेपाली कांग्रेसका केन्द्रीय सदस्य रमेश लेखकले कांग्रेसले सरकारको नेतृत्व गर्न परिपक्क अवस्था बनिनसकेको बताएका छन् । केपी ओली नेतृत्वको सरकारको विकल्प खोज्नुपर्ने विषयमा बहस भइरहेको बेला लेखकले आवश्यक परे सरकारको नेतृत्व गर्न  कांग्रेस तयार रहेको बताएका हुन् ।

उनले सोमबार बसेको पार्टी पदाधिकारी तथा पूर्वपदाधिकारी बैठकमा सरकार गठनको विषयमा कुरा नभएको बताए । समय आए, आवश्यकता परे पार्टीले सरकारको नेतृत्व गर्छ उनले भने ।

यस्तो अवस्था आए सरकारको नेतृत्व गर्छु भनेर पार्टीले भनेकै छ,’ सानेपामा बैठक कक्षबाट बाहिरिँदै लेखकले भने, ‘कांग्रेसको नेतृत्वमा सरकार बनाउन अहिले नै अवस्था परिपक्क भइसकेको छैन ।’ त्यस्तै पार्टीको क्रियाशील सदस्यताको काम टुंग्याउने प्रक्रियाका विषयमा पार्टीभित्र छलफल गर्नै बाँकी रहेको पनि बताए ।