अपराधीकरण गर्ने बाटोमा गृहमन्त्री : नेता धनराज गुरुङ

१३ चैत, काठमाडौं । नेपाली कांग्रेसका नेता धनराज गुरुङले राजनीतिलाई अपराधीकरण गर्ने बाटोमा गृहमन्त्री राम बहादुर थापा बादल लागेको आरोप लगाएका छन् । सामाजिक सञ्जाल ट्वीटर नेता गुरुङले एक विचार लेख्दै राजनीतिलाई अपराधीकरण गर्ने बाटोमा गृहमन्त्री आफै ? लाग्नु लज्जा शरम भएको बताएका हुन् ।

उनले अगाडि अपराधीलाई पक्राउ गर्न आदेश दिने कि पक्राउ परेर जेल सजाय भ‍ोगिरहेकालाई छुटाउन आफै धर्ना दिने हो गृहमन्त्री ज्यु ? भनि प्रश्न समेत गरेका हुन् ।

२०७२ भदौ ७ गते कैलालीको टीकापुरमा भएको हत्याकाण्डमा दोषी ठहर गर्दै २०७५ फागुन २२ गते जिल्ला अदालत कैलालीले सांसद रेशमचौधरीसहित ११ जनालाई जन्मकैदको फैसला सुनाएको थियो ।

रेशमसहित हरिनारायण चौधरी, राजकुमार कठरिया, सुन्दरलाल कठरिया, बृजमोहन डगौरा, राजेश चौधरी, वीरबहादुर चौधरी, प्रदीप चौधरी, विद्रोह भन्ने सीताराम चौधरी, श्रवण चौधरी, गंगाराम डगौरा चौधरीलाई जन्मकैद भएकामा नाबालक भएकाले श्रवण चौधरीलाई १० वर्ष कैद सजाय सुनाइएको थियो ।

अपराधीलाई पक्राउ गर्न आदेश दिने कि पक्राउ परेर जेल सजाय भ‍ोगिरहेकालाई छुटाउन आफै धर्ना दिने हो गृहमन्त्री ज्यु? राजनीतिलाई अपराधीकरण गर्ने बाटोमा गृहमन्त्री आफै? लज्जा शरम! pic.twitter.com/oEEy4yGKoP

— Dhan Raj Gurung (@dhanrgrg) March 26, 2021

१२ जनालाई ३ वर्ष र १ जनालाई ६ महिना कैद सजाय अदालतले सुनाएको थियो । थारू कल्याणकारिणी सभाका केन्द्रीय अध्यक्ष धनीराम चौधरीलगायत ३१ जनालाई फरार सूचीमा राखिएको छ । टीकापुर काण्डको मुद्दा फिर्ता लिनुपर्ने माग जनता समाजवादी पार्टी र थारू कल्याणकारिणी सभाले गर्दै आएका छन् । टीकापुरमा नेपाल प्रहरीका एसएसपी लक्ष्मण न्यौपानेसहित ८ प्रहरी र १ शिशु आन्दोलनकारीबाट मारिएका थिए ।

व्यक्ति हत्या आरोपमा सजाय भुक्तानरत निलम्बित सांसद रेशमलाल चौधरीलगायतमाथि लागेका मुद्दा खारेज, थरुहट आन्दोलनमा ज्यान गुमाएकालाई सहिद घोषणा, मधेसी समूहबाट थारूलाई अलग्गै राख्नुपर्नेलगायतका १९ बुँदे माग राख्दै धर्नामा बसेकालाई सम्बोधन गर्न मन्त्री थापा माइतीघर पुगेका थिए ।